Qadınların məşğulluq imkanlarını genişləndirən qanun layihəsi parlamentdə ikinci oxunuşa tövsiyə olunub
Dekabrın 17-də Milli Məclisin Ailə, qadın və uşaq məsələləri komitəsinin növbəti iclası keçirilib.
Crossmedia.az xəbər verir ki, komitə sədri Hicran Hüseynova iclasda bir məsələnin - Azərbaycan Respublikasının Əmək Məcəlləsində, Cinayət Məcəlləsində, Vergi Məcəlləsində, Cəzaların İcrası Məcəlləsində , “Həmkarlar İttifaqları haqqında”, “Sosial sığorta haqqında”, “Bələdiyyələrin statusu haqqında” , “Valideyn himayəsindən məhrum olmuş uşaqların sosial müdafiəsi haqqında”, “Azərbaycan Respublikasında vərəmlə mübarizə haqqında”, “Narkoloji xidmət və nəzarət haqqında”, “Gənclər siyasəti haqqında”, “Yaşayış minimumu haqqında” “Ünvanlı dövlət sosial yardımı haqqında”, “Gender (kişi və qadınların) bərabərliyinin təminatları haqqında”, “İşsizlikdən sığorta haqqında”, “Əlilliyi olan şəxslərin hüquqları haqqında”, “Məşğulluq haqqında” və “Hesablama Palatası haqqında” qanunlarda dəyişiklik edilməsi barədə qanun layihəsinin ikinci oxunuşda müzakirə ediləcəyini söyləyib.
Bildirilib ki, qanun layihəsi vətəndaşların əmək hüquqlarının təmin olunmasına xidmətlə yanaşı, əmək münasibətlərinin müasir və sosialyönümlü hüquqi tənzimlənməsini təmin etməyi, beynəlxalq əmək normalarına uyğunluğun gücləndirilməsini, habelə normativ-hüquqi aktların tələblərinə uyğunlaşdırmanın aparılmasını nəzərdə tutur. Layihəyə əsasən, ölkədə əmək münasibətlərinin gender bərabərliyi prinsipi əsasında qurulması və qadınların məşğulluq imkanlarının genişləndirilməsi məqsədilə mövcud qanunvericilikdə qadın əməyinin qadağan edildiyi 674 peşə, vəzifə və iş yerinin sayı azaldılaraq 204-ə endirilib.
Komitə sədri qeyd edib ki, qanun layihəsinə daxil edilən anlayışlardan biri də “ailə vəzifələri olan işçi” anlayışıdır və bu dəyişiklik ailə institutunun gücləndirilməsi baxımından xüsusi əhəmiyyət daşıyır.
Qanun layihəsinin müzakirəsində komitənin sədr müavini Jalə Əliyeva, üzvləri Pərvin Kərimzadə, Könül Nurullayeva, Müşfiq Məmmədli, Sevinc Hüseynova, Günay Ağamalı, Səbinə Xasayeva və Ailə, Qadın və Uşaq Problemləri üzrə Dövlət Komitəsinin şöbə müdiri Taliyə İbrahimova çıxış edərək sənədin sosial rifahın gücləndirilməsinə öz töhfəsini verəcəyini söyləyiblər, rəy və təkliflərini səsləndiriblər.
İclasda Milli Məclis Aparatının Sosial qanunvericilik şöbəsinin müdiri Adil Vəliyev, Əmək və Əhalinin Sosial Müdafiəsi Nazirliyi Aparatının Əmək siyasəti şöbəsinin müdiri Fuad Heydərov çıxış edərək qaldırılan məsələlərə aydınlıq gətiriblər.
Sonda qanun layihəsi ikinci oxunuşda Milli Məclisin plenar iclasına tövsiyə olunub.
18:58 17.12.2025
Oxunuş sayı: 927
