Azərbaycanın Avropanın enerji təhlükəsizliyinə töhfəsi müstəqil və uzaqgörən siyasətin nəticəsidir – RƏY
Azərbaycanın Avropa tərəfdaşları ilə əməkdaşlığı çoxşaxəli və strateji əhəmiyyət daşıyan sahələrdə inkişaf edir. Xüsusilə ölkəmizin enerji resurslarının Avropanın enerji təhlükəsizliyində oynadığı rol, həm xam neft və təbii qaz tədarükü, həm də bərpa olunan enerji layihələri ilə bağlı təşəbbüsləri bu əlaqələrin əsas sütunlarını təşkil edir. Eyni zamanda, Azərbaycanın geosiyasi mövqeyi – Şərq–Qərb və Şimal–Cənub nəqliyyat dəhlizlərinin kəsişməsində yerləşməsi – ölkəmizin Avropa ilə logistik və nəqliyyat əməkdaşlığını daha da aktuallaşdırır. Bakı və Varşava arasındakı münasibətlər isə Avropa İttifaqı və NATO çərçivəsində strateji tərəfdaşlığımıza əlavə dəyər qatır, davamlı siyasi dialoq və əməkdaşlığın möhkəmlənməsi üçün zəmin yaradır.
Crossmedia.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib ki, Azərbaycanın Avropanın enerji təhlükəsizliyinə verdiyi töhfə qlobal miqyasda qəbul olunan və yüksək qiymətləndirilən reallıqdır.
Deputat qeyd edib ki, Prezident İlham Əliyevin xüsusi tapşırıqlar üzrə nümayəndəsi Elçin Əmirbəyovun Polşanın “TVP World” telekanalına verdiyi müsahibədə vurğuladığı kimi, Azərbaycan etibarlı tərəfdaş kimi Avropanın enerji təhlükəsizliyinin möhkəmləndirilməsində mühüm rol oynayır.
G.Ağamalı əlavə edib ki, Azərbaycan uzun illər enerji siyasətini sabitlik, etibarlılıq və qarşılıqlı fayda prinsipləri üzərində qurub: "Cənub Qaz Dəhlizi kimi strateji layihələr Avropa bazarlarının şaxələndirilməsinə, enerji asılılıqlarının azaldılmasına və təchizat təhlükəsizliyinin təmin olunmasına real töhfə verir. Bu layihələr həm iqtisadi, həm siyasi, həm də geostrateji baxımdan böyük əhəmiyyət kəsb edir. Xüsusilə son illərdə qlobal enerji bazarlarında yaranmış qeyri-müəyyənlik fonunda Azərbaycanın üzərinə götürdüyü öhdəliklərə sadiq qalması ölkəmizin məsuliyyətli və proqnozlaşdırılan tərəfdaş olduğunu bir daha sübut edib. Azərbaycan Avropa İttifaqının bir sıra üzv dövlətləri ilə uzunmüddətli müqavilələr əsasında əməkdaşlıq edir və bu əməkdaşlıq qarşılıqlı etimad üzərində qurulub. Rusiya-Ukrayna müharibəsinin Avropa müstəvisində yaratdığı enerji boşluğu və təhlükəsizlik çağırışları Azərbaycan kimi etibarlı tərəfdaşlar sayəsində müəyyən qədər öz həllini tapdı. Artıq dövlətləri ölkəmizlə əməkdaşlığa daha aktiv maraq göstərir və bu da Azərbaycanın beynəlxalq mövqeyinin güclənməsinə xidmət edir".
Parlamentari bildirib ki, Azərbaycan yalnız ənənəvi enerji mənbələri ilə kifayətlənmir, eyni zamanda bərpa olunan enerji sahəsində də Avropa ilə əməkdaşlığı genişləndirməyi hədəfləyir: "Yaşıl enerji layihələri, enerji dəhlizləri və ixrac potensialı ölkəmizin Avropanın enerji təhlükəsizliyində rolunu daha da möhkəmləndirəcək. Azərbaycanın Avropanın enerji təhlükəsizliyinə verdiyi töhfə müstəqil, balanslaşdırılmış və uzaqgörən xarici siyasətimizin nəticəsidir. Bu siyasət regionda sabitliyin təminatçısıdır və Azərbaycanın beynəlxalq nüfuzunu daha da möhkəmləndirir".
Mehriban Yariyeva
10:31 16.12.2025
Oxunuş sayı: 1661
