Kəmaləddin Heydərov: Azərbaycan – Qətər əlaqələri genişlənir
Azərbaycan və Qətər Hökuməti arasında Birgə İqtisadi, Ticarət və Texniki Komissiyanın həmsədri, fövqəladə hallar naziri Kəmaləddin Heydərov Qətərin Milli günü münasibətilə həmin ölkənin Bakıdakı Səfirliyində təşkil olunan rəsmi qəbulda iştirak edib.
Crossmedia.az xəbər verir ki, Fövqəladə Hallar Nazirliyindən məlumat verilib.
Bildirilib ki, qəbulda çıxış edən nazir Kəmaləddin Heydərov Milli gün münasibətilə Qətər xalqını Azərbaycanın Prezidenti İlham Əliyevin adından təbrik edib, Qətərə əmin-amanlıq və davamlı tərəqqi arzulayıb.
Azərbaycan və Qətər arasında otuz ildən artıq müddətdə formalaşmış diplomatik münasibətlərin dostluq və qarşılıqlı hörmətə əsaslandığını vurğulayan nazir iki ölkə liderlərinin müdrik, ardıcıl və uzaqgörən siyasəti nəticəsində ölkələr arasında çoxşaxəli əlaqələrin daim genişləndiyini xatırladıb.
Bu çərçivədə, Azərbaycan Hökuməti və Qətər Hökuməti arasında Birgə İqtisadi, Ticarət və Texniki Komissiyanın fəaliyyəti qeyd olunub. Cari ilin noyabr ayında keçirilmiş Komissiyanın dördüncü iclasının iki ölkə arasında iqtisadi əməkdaşlığın dərinləşdirilməsi istiqamətində mühüm addım olduğunu deyən nazir iclas çərçivəsində təşkil olunan Azərbaycan-Qətər Birgə Biznes Şurasının ilk iclası barədə danışıb.
K.Heydərov, həmçinin Azərbaycanın Fövqəladə Hallar Nazirliyi ilə Qətər Dövlətinin müvafiq qurumları arasında fövqəladə halların idarə edilməsi sahəsində əməkdaşlıq münasibətlərindən danışıb, əlaqələrin müxtəlif istiqamətlər üzrə genişləndirilməsinin qarşılıqlı faydasını qeyd edib.
15:30 11.12.2025
Oxunuş sayı: 1000
