Ermənistanın Baş naziri: Azərbaycan və Ermənistan arasında sülh qurulub, indi əsas vəzifə onu möhkəmləndirməkdir
Ermənistanın baş naziri Nikol Paşinyan ölkə parlamentində çıxışı zamanı Azərbaycanla Ermənistan arasında artıq sülhün qurulduğunu və bu mərhələdə əsas məqsədin həmin sülhü möhkəmləndirmək və institusional çərçivəyə salmaq olduğunu bildirib.
Bu barədə Crossmedia.az xarici KİV-ə istinadən xəbər verir.
Paşinyanın sözlərinə görə, iki ölkə arasında etimadın artması real proseslərə birbaşa təsir edir:
“Şərti desək, Ermənistan və Azərbaycan arasında etimadın hər bir millimetr artımı praktik sahədə on santimetr irəliləyiş deməkdir. Bu gün sülh perspektivlərinə 2025-ci il avqustun ortaları ilə müqayisədə daha çox optimistəm”, — deyə o vurğulayıb.
Baş nazir çıxışında ölkənin dövlət borcunun artması barədə müzakirələrə də münasibət bildirib. O qeyd edib ki, müxalifətin səsləndirdiyi iradlar reallığı əks etdirmir.
“Müdafiə Nazirliyi üçün büdcədə nəzərdə tutulan 4,4 milyard dollarlıq kapital xərclərini görmürlər? Bu necə mümkündür? Bundan əlavə, Qarabağ və Qarabağdan olan qaçqınlarla bağlı qeyri-proqnozlaşdırılan funksiyalara ayrılan vəsaitlər də var. Başqa heç bir gizli məsələ yoxdur”,— deyə Paşinyan bildirib.
Baş nazir əlavə edib ki, sülhün bərqərar olması fonunda artıq bu kimi məlumatların açıq şəkildə paylaşılması mümkündür.
Türkanə Məşədiyeva
16:00 03.12.2025
Oxunuş sayı: 685
