Paşinyan danışıqlar paketi ilə bağlı müxalifətə sərt cavab verdi
“Müxalifət yeni mövzu tapıb, deyirlər ki, danışıqlar paketini dərc edin. Danışıqlar paketi dərc olundu. İndi də çoxdan köhnəlmiş eyni narrativləri səsləndirirlər”.
Crossmedia.az xarici mediaya istinadən xəbər verir ki, bunu bu gün Ermənistan parlamentində 2026-cı il dövlət büdcəsi layihəsinin müzakirəsi zamanı yekun çıxışında ölkənin Baş naziri Nikol Paşinyan bildirib.
“Mən sizə bir formula deyirəm ki, müxalifətin qaldırdığı bütün sualların cavabını verir. Onlar danışıqlar prosesindən danışanda deyirlər ki, belə olmalı idi, elə olmalı idi. Gəlin onlara sual verək: siz 30 ildən çox hakimiyyətdə olmusunuz, əgər belə bir şans var idisə, bəs niyə həll etmədiniz?
Deməli, ermənipərəst həll imkanı olub, siz bunu etməmisiniz? Onda niyə bizi satqın adlandırırsınız? Elə isə sizdən böyük satqın yoxdur. Yaxud digər variant budur ki, bunların hamısı sadəcə göz yummadır”, - deyə Paşinyan qeyd edib.
Paşinyan düşüncəsini bir daha təkrarlayıb ki, 2019-cu ildə masaya qoyulan sənəd ondan əvvəl mövcud olub və bunu həmin sənəddə “Ermənistan prezidenti” ifadəsinin yazılması sübut edir, halbuki o, heç vaxt prezident olmayıb.
“2019-cu ilin sənədi belə ortaya çıxıb: 2018-ci ildə mən Baş nazir olanda həmsədrlərə dedim ki, burada bir yığın sənəd var, mən başa düşmürəm, bunlardan hansıdır danışıqlar prosesinin əvvəlki mərhələsinin xülasəsi, başlanğıc nöqtəsi? 2019-cu ilin iyunundakı sənəd məhz budur. Mən onlara demişdim ki, əvvəlki mərhələnin xülasəsini deyin. Həmsədrlər bunu əvvəlki mərhələnin xülasəsi kimi təqdim ediblər və mən də həmin kontekstdə sual vermişəm ki, yaxşı, mən oxuyuram, indi mənə sizin şərhiniz maraqlıdır, bu paketlər çərçivəsində Qarabağ Azərbaycanın tərkibində olmaya bilərdimi? Çox dəqiq cavab səslənib: bəli, əgər Azərbaycan razılaşsaydı. Bu həm də sənəddə yazılıb, amma sən prosesə yeni daxil olanda düşünürsən ki, bəlkə yazılanı düz şərh etmirsən.
Həmin sənəd Serj Sarkisyanın 2018-ci ilin aprelində bu tribunada etdiyi çıxışın davamıdır, hekayə bununla bitir. Danışıqlar prosesində ümumiyyətlə, fərqli şərh ediləcək heç nə yoxdur. Ermənistanın orta statistik vətəndaşı həmin paketi əvvəlindən axırına kimi oxusa, onun üçün heç bir sual yaranmayacaq”, - deyə o vurğulayıb.
15:40 03.12.2025
Oxunuş sayı: 566
