Hüquqşünas ixtisası üzrə 5 ildən çox işləyən Azərbaycan vətəndaşları hakim ola bilərlər - Hüquqşünas
Dövlət İmtahan Mərkəzinin elektron imtahan korpusunda keçirilən yazılı mərhələ hüquqçuların təkcə nəzəri biliklərini yox, həm də düşüncə çevikliyini sınağa çəkdi. Namizədlər qarşılarına qoyulan hüquqi kazuslarla həm öz peşə hazırlıqlarını göstərməyə, həm də ədalət mühakiməsinə uzanan çətin yolda layiqli olduqlarını sübut etməyə çalışdılar. Test mərhələsini uğurla keçən 151 nəfərin bu imtahanı hakimlik arzusunun ən taleyüklü mərhələlərindən biri hesab olunur və nəticələr Hakimlərin Seçki Komitəsi tərəfindən yoxlanıldıqdan sonra açıqlanacaq.
Mövzu ilə bağlı hüquqşünas Ramil Süleymanov Crossmedia.az-a açıqlama verib. O, bildirib ki, Azərbaycan Respublikasının Konstitusiyasının 126-cı maddəsinə əsasən, seçkilərdə iştirak etmək hüququna malik olan, ali hüquq təhsilli və hüquqşünas ixtisası üzrə 5 ildən çox işləyən Azərbaycan vətəndaşları hakim ola bilərlər: “Məhkəmələr və hakimlər haqqında” qanunun 92-ci maddəsinə görə isə hakimlər ədalət mühakiməsini həyata keçirmək üçün qanunla müəyyən olunmuş səlahiyyətlərə malik şəxslərdir. Hakimliyə təyin olunmaq üçün namizədlərə bir sıra tələblər qoyulur. Məsələn, hakimin ikili vətəndaşlığı olmamalıdır, digər dövlətlər qarşısında öhdəliyi ola bilməz. Din xadimi statusunda olan şəxslər, fəaliyyətsiz və ya məhdud fəaliyyət qabiliyyətli şəxslər hakimliyə qəbul edilmir. Eyni zamanda fiziki və ya əqli pozuntusu onun vəzifəsini icra etməsinə mane olmamalıdır. Həmçinin əvvəllər cinayət təqibinə bəraətverici əsas olmadan hakim vəzifəsindən azad olunmuş şəxslər yenidən hakim ola bilməzlər. Namizədlər mütləq şəkildə Məhkəmə-Hüquq Şurası tərəfindən keçirilən üç mərhələli imtahandan keçməlidirlər. Birinci mərhələ test imtahanıdır və Dövlət İmtahan Mərkəzi ilə birgə təşkil olunur. İkinci mərhələ kazus imtahanıdır - namizədlərə konkret iş verilir və onlar bilik və bacarıqlarını tətbiq edirlər. Üçüncü mərhələ isə icbari təlim mərhələsidir. Bu mərhələni tamamlayan namizədlər yekun imtahandan sonra hakim təyin edilə bilirlər. Hakimlər dövlətin adından qərar qəbul etdikləri üçün onların fəaliyyətinə üçillik qiymətləndirmə tətbiq olunur. Birinci instansiya məhkəmələrinin hakimləri Prezidentin sərəncamı ilə təyin olunur. Apellyasiya instansiyasına hakimlər Prezidentin təqdimatı əsasında Milli Məclis tərəfindən təyin edilir. Bu qayda Ali Məhkəməyə də şamil olunur. Ali Məhkəmə hakimləri üçün maksimal yaş həddi 68, digər məhkəmə instansiyalarında isə 66-dır’’.
Təhsil eksperti Elçin Əfəndi isə açıqlamasında bildirib ki, hakimliyin əvvəlcədən bağlanan imtahanı keçirilir: “Bu imtahan Dövlət İmtahan Mərkəzi və aidiyyəti qurumlar tərəfindən təşkil olunur və burada ümumi biliklərin yoxlanılması zərurət tələb edir. Eyni zamanda namizədlərin digər sahələr üzrə peşə biliklərinin səviyyəsi də qiymətləndirilir ki, bu da mütəxəssislərin seçimində mühüm rol oynayır. Bu prosesin müsbət tərəfi odur ki, hakimlik elə bir sahədir ki, burada dəqiq və ədalətli qərarların verilməsi vacibdir. Buna görə də yalnız bilik və peşəkarlıq baxımından yüksək nəticə göstərən şəxslərin imtahan əsasında seçilməsi sözün hər mənasında müsbət məna daşıyır’’.
Sevinc Yarməmmədova
12:58 02.12.2025
Oxunuş sayı: 1221
