Azərbaycanın milli təhlükəsizliyinə qarşı qurulan bütün planlar iflasa məhkumdur - Deputat
Son dövrlərdə ölkə gündəmində geniş müzakirə olunan məsələlərdən biri də uzun illərdir xarici təsir mərkəzlərinə bağlı şəkildə fəaliyyət göstərən, ictimai-siyasi proseslərə kölgə salmağa çalışan şəbəkələrin ifşa olunmasıdır. Azərbaycanın dövlətçilik maraqlarına zidd istiqamətdə gizli və koordinasiyalı fəaliyyəti müşahidə edilən bu qrupların açıqlanması təsadüfi deyil; bu, dövlətin təhlükəsizlik və suverenlik prinsipinə söykənən ardıcıl siyasətinin məntiqi nəticəsidir.
Müasir Azərbaycan dövləti qanunun aliliyini ali dəyər kimi qəbul edir və heç bir siyasi qrupun, fərdin və ya təşkilatlanmış şəbəkənin hüquqi məsuliyyətdən kənarda qalmasına imkan vermir. Ölkənin ictimai-siyasi həyatında özlərini “islahatçı”, “demokrat” və ya “alternativ qüvvə” kimi təqdim edən bəzi dairələrin xarici maraqlara uyğun fəaliyyətinə dair faktların üzə çıxarılması isə mövcud reallıqları daha da aydın göstərir.
Bu kontekstdə aparılan araşdırmalar, ifşa olunan siyasi oyunlar və cəmiyyətə açıqlanan məlumatlar dövlətin milli təhlükəsizliyi təmin etməkdə nə qədər qətiyyətli və sistemli mövqe sərgilədiyini bir daha nümayiş etdirir.
Dövlət Təhlükəsizliyi Xidmətinin son əməliyyatları bir daha sübut etdi ki, Azərbaycanın sabitliyi, milli təhlükəsizliyi və dövlətçilik maraqları etibarlı əllərdədir.
Məsələ ilə bağlı Milli Məclisin deputatı Müşfiq Məmmədli Crossmedia.az-la öz fikirlərini bölüşüb:
"Uzun illərdir xarici mərkəzlərin təsiri altında fəaliyyət göstərən və “beşinci kolon” kimi tanınan şəbəkələrin ifşası təsadüfi deyil: Azərbaycan dövlətinə qarşı gizli fəaliyyət göstərən qruplar ardıcıl şəkildə üzə çıxarılır və hüquqi qiymətini alır. Heç kim istər - siyasi qrup, istərsə də fərd qanundan üstün deyil.
Özlərini “islahatçı” və ya “demokrat” kimi təqdim edən bəzi şəxslərin, o cümlədən Ramiz Mehdiyevin ətrafında formalaşan siyasi dairələrin, eləcə də onların təsirində olan qüvvələrin AXCP rəhbərliyi, Gültəkin Hacıbəyli kimi siyasi simaların xarici tapşırıqlarla hərəkəti artıq cəmiyyət üçün aydın reallığa çevrilib.
2013-cü il prezident seçkiləri öncəsi Rusiyadakı müəyyən mərkəzlər tərəfindən yaradılan “şura” və oxşar strukturların əsas məqsədi ölkəni yenidən xaosa sürükləmək olub.
2003-cü ildə reallaşdırılması planlaşdırılan, lakin baş tutmayan ssenarilərin təkrar gündəmə gətirilməsi həmin vaxt da, bu gün də qarşısıalınmazdır. Xalq–iqtidar birliyi bütün bu məkrli niyyətləri neytrallaşdırdı.
Bu gün Azərbaycan tamam başqa reallıqda yaşayır ərazi bütövlüyü bərpa olunmuş, regionda güclü mövqeyə sahib bir dövlətdir. Daxili və xarici antiazərbaycan mərkəzlərinin bütün cəhdləri sıfıra endiriləcək. Dövlət rəhbərliyi hökmən hər bir təhdidi zərərsizləşdirməyə qadirdir.”
Deputat, həmçinin ölkə ictimaiyyətinə də müraciət edib:
“Azərbaycan xalqının iradəsi, dövlətimizin gücü və xalq–iqtidar birliyi qarşısında heç bir qaranlıq plan dayana bilməz. Bu ölkədə sabitliyi pozmaq istəyən hər kəs anlamalıdır ki, Vətənə xəyanətin nə keçmişi var, nə də gələcəyi. Heç bir zaman da bəraət tapmayacaq. Yaşasın müstəqil Azərbaycan!
Yaşasın xalq–iqtidar birliyi!”
Fatimə Hacıəliyeva
21:22 30.11.2025
Oxunuş sayı: 1490
