İsrail ordusu Hizbullah komandanının zərərsizləşdirilməsi ilə bağlı yeni detalları açıqlayıb
İsrail ordusunun mətbuat xidməti Hizbullahın baş komandanı Təbatəbainin öldürülməsi əməliyyatı ilə bağlı əlavə məlumat yayıb.
Crossmedia.az xarici KİV-ə istinadən xəbər verir ki, İsrail kəşfiyyatının məlumatlarına əsasən, Təbatəbai barədə kəşfiyyat toplanması onilliklər boyu davam edib və xüsusilə son aylarda onun hərəkətləri yaxından izlənilib. Şərhə görə, əməliyyatı həyata keçirmək imkanı yarandığı andan proses çox sürətlə inkişaf edib – siyasi razılıqdan tutmuş hava zərbələrinə qədər bütün mərhələlər bir saata yaxın müddətdə tamamlanıb.
Məlumata görə, Təbatəbai 1980-ci illərdə Hizbullaha qoşulub və təşkilat daxilində əsas əməliyyatçılardan biri olub. O, uzun illər ərzində müxtəlif rəhbər postlarda çalışıb, o cümlədən Hizbullahın xüsusi təyinatlı “Radvan” bölməsinə komandanlıq edib. Müharibə dövründə isə döyüş əməliyyatlarına birbaşa rəhbərlik etdiyi bildirilir.
Analitiklərə görə, Təbatəbainin zərərsizləşdirilməsi Hizbullahın hərbi strukturu üçün ciddi itki hesab olunur və bölgədəki vəziyyətə təsir göstərməsi mümkündür.
23:35 30.11.2025
Oxunuş sayı: 1084