Erməni hərbi qulluqçunun anası: Müharibədə Ermənistan tərəfi təxminən 7000 ölü verib
“Alen Simonyan yalan danışır, Nikol Paşinyan da yalan danışır. 2020-ci ilin 44 günlük Qarabağ müharibəsində Ermənistan tərəfi, əgər daha çox deyilsə, təxminən 7000 ölü verib”.
Crossmedia.az xəbər verir ki, bunu “168.am” nəşrinə açıqlamasında 44 günlük müharibədə məhv edilmiş erməni mayor David Aruşanyanın anası Lida Aruşanyan Ermistan parlamentinin sədri Alen Simonyanın “Facebook”da etdiyi paylaşıma münasibət bildirərkən deyib.
“De ki, ay qadın, sən nə bilirsən, ay tikan? Niyə beş il keçdikdən sonra indi deyir? Yalan danışır. Əgər daha çox deyilsə, bizim təxminən 7 min ölümüz olub. Mən çox panteonlarda olmuşam. Kim bizim panteona gəlirsə, dəli kimi çıxır. Leninakanda olmuşam, Kirovakanda olmuşam, hər kənddə olmuşam… O, təsadüfi bir rəqəm deyir. Çünki onların dərdi deyil, ağrısı deyil. Yalan danışır”, - deyə məhv edilmiş erməni hərbi qulluqçunun anası bildirib.
Aruşanyanın sözlərinə görə, hərbçilərdən və ölmüş hərbçilərin ailələrindən toplanmış məlumatları birləşdirərək tam əmindir ki, ölənlərin sayı ən azı 7000-dir.
O, həmçinin sual verib ki, əgər ölənlərin sayı, indiki hakimiyyətin iddia etdiyi kimi, həqiqətən 3833-dürsə, bəs nə üçün bu günə qədər müharibədə ölənlərin tam siyahısı dərc olunmayıb?
“Ona görə ki, insanlara həqiqəti demək istəmirlər. Onlar qorxurlar. Elə düşünməyin ki, böyük-böyük danışırlar, Bakıya gedirlər, guya hər şeyə qadirdirlər… Xeyr, onlar həm acizdirlər, həm qorxaqdırlar, həm də savadsızdırlar”, - deyə Aruşanyan əlavə edib.
Xatırladaq ki, Simonyan “Facebook” səhifəsində paylaşım edərək bildirib ki, 2020-ci il 44 günlük müharibədə 3833 nəfər ölüb. Daha sonra yayımladığı videoda o qeyd etmişdi ki, bu rəqəm çoxdan rəsmən dərc olunub.
15:30 29.11.2025
Oxunuş sayı: 1270
