Qusarda qadınlar üçün səyyar tibbi aksiya keçirilib
Qusar rayonun ucqar kəndlərində yaşayan qadınların sağlamlığının qorunması məqsədilə səyyar tibbi aksiyalara başlanılıb.
Bu barədə Crossmedia.az-a TƏBİB-dən məlumat verilib.
Bildirilib ki, ilk tibbi aksiya rayonun Həzrə kəndində təşkil olunub və müayinələrə ətraf kəndlərdən də qadınlar cəlb edilib.
Dövlət-özəl tərəfdaşlığı çərçivəsində dövlət və özəl tibb müəssisələrinin birgə təşkilatçılığı ilə keçirilən tibbi aksiyada 200-dən çox qadın iştirak edib.
Aksiya çərçivəsində qadınlara ginekoloq, onkoloq-mammoloq və kardioloq tərəfindən süd vəzilərinin ultrasəs müayinəsi (USM), kolposkopiya (PAP test), ginekoloji yaxmanın mikroskopik testi, elektrokardioqramma (EKQ) və qanın ümumi analizləri və s. tibbi xidmətlər göstərilib.
İxtisaslı həkim-mütəxəssislər tərəfindən müayinə olunan vətəndaşlar 1000-ə yaxın tibbi xidmətdən yararlanıb və müayinələr zamanı ixtisaslı tibbi xidmətlərə ehtiyacı yaranan sakinlərin aidiyyəti tibb müəssisələrinə yönləndirilməsi təmin edilib.
Aksiyanın məqsədi qadınlarda uşaqlıq boynu, süd vəzi xərçəngi, kardioloji və s. xəstəliklərin vaxtında aşkarlanması, qadınların sağlamlığının qorunması, onların maarifləndirilməsi və o cümlədən aztəminatlı şəxslərin vaxtında müayinələrə cəlb olunmasını təmin etməkdir.
Qeyd edək ki, qadınların sağlamlığının qorunması məqsədilə təşkil edilən səyyar tibbi aksiyanın rayonun digər kəndlərində də keçirilməsi nəzərdə tutulur.
14:15 25.09.2025
Oxunuş sayı: 6350
