ABŞ: Rusiya-Ukrayna müharibəsi üzrə danışıqlar iki əsas məsələdə çətinlik yaradır
ABŞ vitse-prezidenti Cey Di Vens Rusiyanın Ukraynaya qarşı müharibəsinin dayandırılması ilə bağlı danışıqları “çox mürəkkəb” adlandırıb. Onun sözlərinə görə, proses iki əsas məqam ətrafında cəmləşib: Ukrayna üçün təhlükəsizlik təminatları və Moskvanın müəyyən ərazilərə nəzarəti.
Crossmedia.az xəbər verir ki, bu barədə xarici media mənbələri məlumat verib.
Vens bildirib ki, Kiyev sülh sazişindən sonra öz ərazi bütövlüyünə zəmanət almaq və Rusiyanın gələcəkdə yeni hücuma başlamayacağına əmin olmaq istəyir. Kreml isə bəzi ərazilərə nəzarətin tanınmasında israr edir. Həmin torpaqların bir hissəsi hazırda Rusiya tərəfindən işğal olunub, digər hissəsi isə onun nəzarətində deyil.
Amerikalı siyasətçi həmçinin qeyd edib ki, Ukrayna və Rusiya prezidentlərinin şəxsi görüşü danışıqlar prosesinin irəliləməsinə kömək edə bilər.
“Ukraynalılar təhlükəsizlik təminatları istəyirlər, ruslar isə müəyyən ərazilər. Danışıqların mahiyyəti də məhz bundadır”, – deyə o əlavə edib.
Vensin sözlərinə görə, ABŞ bu istiqamətdə iş aparır, lakin danışıqların vaxtı və yeri hələ müəyyənləşdirilməyib. O həmçinin Vladimir Putinlə telefon danışığı apardığını və onun “gözləniləndən daha soyuqqanlı” təsir bağışladığını bildirib.
Fatimə Məmmədova
10:46 21.08.2025
Oxunuş sayı: 832
