Qulu Məhərrəmli: "PR hər zaman bir alət kimi özünü göstərməyə çalışır"
“İctimaiyyətlə əlaqələrin əsasları” dərs vəsaiti bu sahənin nəzəri və praktiki əsaslarını əhatə edən fundamental bir əsərdir. Kitabda ictimaiyyətlə əlaqələrin tarixi inkişafı, nəzəriyyələri və əsas prinsipləri geniş təqdim olunur".
Crossmedia.az xəbər verir ki , bu fikirləri BDU-nun Jurnalistika fakültəsinin Multimedia və elektron kommunikasiya kafedrasının müdiri, filologiya elmləri doktoru, professor Qulu Məhərrəmli "İctimaiyyətlə Əlaqələrin Əsasları"dərs vəsaitinin təqdimatı zamanı deyib: "Müəlliflər dövlət və özəl sektorda auditoriyalarla münasibətlərin tənzimlənməsi üzrə strategiyalar, plan və proqramları, eləcə də böhran vəziyyətlərinin idarə olunması kimi aktual mövzuları əhatə ediblər. Mətbuatla əməkdaşlıq, press-relizlərin hazırlanması, sosial media ilə iş və digər praktiki alətlər də dərs vəsaitində real nümunələrlə şərh olunur. Kitabda ictimaiyyətlə əlaqələr sahəsində yaranan yeni tendensiyalar, o cümlədən rəqəmsal texnologiyalar və süni intellektin tətbiqi də təqdim edilib.
Bu vəsait ali məktəblərdə jurnalistika, kommunikasiya və idarəetmə ixtisasları üzrə təhsil alan tələbələr, həmçinin PR sahəsində çalışan mütəxəssislər üçün nəzərdə tutulub. Kitabın müəllifləri Vüqar Zifaroğlu, Aynur Nəsirova, Xatira Hüseynova, Pərvanə İbrahimova, Vəfa İsgəndərova, Afət Yaqubova, Vəli Əlibəyov, Yədgar Cəfərov, Zanura Talıbova, Natiq Pənahlıdır".
O qeyd edib ki, PR hər zaman bir alət kimi özünü göstərməyə çalışır. "Biz əgər tələbələrə kömək etmək istəyiriksə, bildiklərimizi kitablara köçürməliyik. Hesab edirəm ki, gələcəkdə bu kitabın tələbələrə böyük yardımı olacaq".
Fatimə Məmmədova
18:06 15.07.2025
Oxunuş sayı: 9574
