"Son 25 ildə türk dövlətlərində və topluluqlarında futbol xeyli populyarlaşıb"
“Güney Azərbaycanın başkəndi Təbrizin “Traktor” futbol klubunun Tovuzun “Turan” klubu ilə yoxlama oyunu Azərbaycanda maraqla izləniləcək. “Traktor” ölkəmizdə çox populyardır. “Traktor”un bütün oyunlarında Təbrizin “Səhənd” stadionu dolu olur. Bu onunla bağlıdır ki, Təbrizdə, Güney Azərbaycanda futbolu çox sevirlər. Həm də “Traktor” bir futbol klubundan çox Güney Azərbaycan türklərinin azadlıq mübarizəsinin simvoludur. “Traktor”un bütün oyunlarında azarkeşlər, həm də milli fəallar İranda ana dilində təhsil hüququ tələb edir, siyasi dustaqlara azadlıq istəyirlər”.
Bunu Crossmedia.az-a açıqlamasında Güney Azərbaycan üzrə araşdırmaçı jurnalist Elman Cəfərli deyib. Onun sözlərinə görə, “Traktor” klubunun Azərbaycanın digər klubları ilə yoxlama oyunlarının, dostluq matçlarının keçirilməsi çox vacibdir: “Son 25 ildə türk dövlətlərində və topluluqlarında futbol xeyli populyarlaşıb. Türk cümhuriyyətlərini təmsil edən güclü klublar, yığmalar yaranıb. Türkiyə millisi dünya çempionatının bürünc mükafatını alıb, Avropa üçüncüsü olub. İstanbulun “Qalatasaray” klubu Avropa Liqasının qalibi olub. Özbəkistan millisi dünya çempionatına vəsiqə qazanıb. Azərbaycanın “Qarabağ”, “Neftçi”, “Qəbələ” klubları Avropa liqalarına uğurlu çıxışlar edib. Təbrizi “Traktor” klubu bu sezon İran çempionu oldu. Qazaxıstanın
“Kayrat”, “Astana”, “Aktobe”, “Tobol” Avropa arenasında, Özbəkistanın “Paxtakor”, “Neftçi Fərqanə” kimi klubları Asiya birinciliklərində uğurlu çıxışları ilə seçilir. Türk cümhüuriyyətləri və topluluqları arasında mədəni, kültürəl əlaqələrin dərinləşməsində idman, xüsusən futbol böyük rol oynaya bilər. Yaxşı olar ki, futbol klubları arasında dostluq oyunları sıx-sıx təşkil edilsin. Ötən il “Qalatasaray”la “Qarabağ” arasında Bakıda yoldaşlıq oyunu keçirildi. Türkiyədə “Turan”la “Traktor” arasında oyunun keçirilməsi gözlənilir. Yaxşı olar ki, “Traktor” klubu Bakıya, Xankəndiyə dəvət edilsin. Bir yoldaşlıq görüşü də Bakıda və Qarabağda təşkil edilsin. Biz “Traktor”u sevdiyimiz kimi güneylilər də Azərbaycan milli komandalarının oyunlarını izləyir, “Qarabağ”a, “Turan”a, “Neftçi”yə azarkeşlik edirlər”.
Elman Cəfərli deyib ki, yoldaşlıq görüşləri həm də futbolun populyarlaşmasına xidmət edir.
Nuray Mikayıllı
15:49 12.07.2025
Oxunuş sayı: 848
