Qətərdən İrana sərt cavab: “Əl-Udeyd”ə hücum suverenliyə açıq təcavüzdür
Qətər xarici işlər nazirliyi İranın Qətər ərazisində yerləşən ABŞ-yə məxsus “Əl-Udeyd” hava bazasına raket hücumu ilə bağlı rəsmi bəyanat yayıb.
Crossmedia.az xəbər verir ki, nazirliyin sözçüsü Məcid Əl Ənsari hücumu kəskin şəkildə pisləyib və bunu Qətərin suverenliyinə və beynəlxalq hüquqa qarşı kobud pozuntu adlandırıb.
“Qətər Dövləti İran İnqilabı Keşikçiləri Korpusu tərəfindən “Əl-Udeyd” Hava Bazasını hədəf alan hücumu qətiyyətlə pisləyir. Bu, dövlətimizin hava məkanına və beynəlxalq hüquqa açıq təcavüzdür”, – deyə Əl Ənsari bildirib.
Qətər tərəfi hücuma qarşı hava hücumundan müdafiə sistemlərinin dərhal reaksiya verdiyini və raketlərin ələ keçirildiyini açıqlayıb. Müdafiə Nazirliyi hücumla bağlı əlavə detalları yaxın zamanda paylaşacaq.
Qətər rəsmisi, hücum nəticəsində xəsarət alan və ya tələfatın qeydə alınmadığını təsdiqləyib. Onun sözlərinə görə, təhlükəsizlik tədbirləri çərçivəsində baza öncədən boşaldılıb və şəxsi heyətin, o cümlədən Qətər Silahlı Qüvvələri və beynəlxalq tərəfdaşların təhlükəsizliyi təmin edilib.
Bəyanatda həmçinin vurğulanır ki, belə gərginləşdirici hərbi əməliyyatlar regionun sabitliyi üçün ciddi təhlükə yaradır və beynəlxalq sülhə fəlakətli nəticələr doğura bilər. Qətər tərəfi bütün tərəfləri hərbi əməliyyatları dayandırmağa və diplomatik danışıqlara dərhal başlamağa çağırıb.
Qətər qeyd edib ki, İsrailin bölgədəki eskalasiyası ilə bağlı ilk xəbərdarlıq edən ölkələrdən biri olub və daim dialoq və mehriban qonşuluq prinsiplərinə sadiq qalıb.
05:46 24.06.2025
Oxunuş sayı: 911
