İsrail müdafiə naziri Xameneyiyə qarşı sərt çıxış edib
İsrailin müdafiə naziri İsrael Kaats İranın ali lideri Əli Xameneyiyə qarşı birbaşa və sərt bəyanatla çıxış edib. Müdafiə naziri çıxışı zamanı İran rəhbərliyini açıq şəkildə hədəf alıb və onu təhlükəli lider kimi təqdim edib.
Crossmedia.az xarici mediaya istinadən bildirir ki, Kaats Əli Xameneyini “müasir dövrün Hitleri” adlandıraraq, onun ölkəsinin resurslarını İsrailin məhv edilməsi üçün istifadə etdiyini deyib. “Belə bir diktatorun yaşamasına imkan verilməməlidir. Xameneyi müasir Hitlərdir, o, ölkəsinin bütün potensialını İsrailə qarşı yönəldir” – deyə müdafiə naziri vurğulayıb. Kaatsın sözlərinə görə, İranın hazırkı siyasi kursu təkcə İsrail üçün deyil, həm də regional sabitlik üçün ciddi təhdiddir.
İsrail rəsmisinin bu bəyanatı beynəlxalq mediada geniş rezonans doğurub. Ekspertlər hesab edirlər ki, bu kimi sərt ritorikalar iki ölkə arasında onsuz da gərgin olan münasibətlərin daha da pisləşməsinə səbəb ola bilər. İsrail rəhbərliyi son aylarda dəfələrlə İranın nüvə proqramını və regional təsirini tənqid edib, Tehranı İsrailin milli təhlükəsizliyi üçün əsas təhdidlərdən biri kimi göstərib.
Qeyd edək ki, İranla İsrail arasında diplomatik münasibətlər yoxdur və tərəflər uzun illərdir bir-birini açıq şəkildə ittiham edir. Xameneyinin rəhbərlik etdiyi İran rejimi İsrailin siyasətini və mövcudluğunu dəfələrlə tənqid edib. Bu kontekstdə İsrailin müdafiə nazirinin sərt çıxışı, regionda baş verə biləcək yeni gərginliklərin siqnalı kimi qiymətləndirilir.
Fatimə Nəbiyeva
17:27 19.06.2025
Oxunuş sayı: 8396
