Bahçelidən Azərbaycanla bağlı qəti mesaj: Qardaşlığımıza nifaq salmağa imkan verməyəcəyik
Türkiyənin Milliyyətçi Hərəkat Partiyasının (MHP) sədri Devlet Bahçeli Azərbaycan-Türkiyə münasibətlərinin sarsılmaz qardaşlıq bağlarına əsaslandığını və bu əlaqələrə xələl gətirə biləcək hər hansı təşəbbüsə qarşı birgə mövqe nümayiş etdirilməsinin vacibliyini bildirib.
Crossmedia.az xəbər verir ki, bu barədə MHP lideri Türk Dövlətləri Təşkilatı (TDT) və Türkiyənin təşkilata qarşıdakı sədrliyi ilə bağlı yaydığı yazılı bəyanatda bildirib.
Bahçeli qeyd edib ki, dünyada siyasi, iqtisadi və geosiyasi proseslərin sürətləndiyi bir dövrdə Türk Dövlətləri Təşkilatının inkişafı türk dünyasının gələcəyi baxımından mühüm əhəmiyyət daşıyır.
Onun sözlərinə görə, təşkilat ortaq tarix, mədəniyyət və gələcək baxışının institusional əsasına çevrilib. Türk dövlətləri arasında siyasi, iqtisadi, ticari, nəqliyyat və enerji sahələrində əməkdaşlıq genişlənir.
MHP sədri vurğulayıb ki, türk dövlətləri arasında münasibətlərin təməlində hər bir ölkənin suverenliyinə, müstəqilliyinə, ərazi bütövlüyünə və daxili qanunvericiliyinə hörmət prinsipi dayanır.
“Egeydən Xəzərə qədər Türkiyə və Azərbaycan eyni mənəvi coğrafiyanın iki güclü dövlətidir. İki ölkə arasındakı qardaşlıq münasibətlərinə zərər vurmağa yönəlmiş hər cür yanaşma qarşısında sağlam düşüncə, qarşılıqlı anlaşma və ortaq mövqe əsasında hərəkət etmək böyük əhəmiyyət daşıyır”, – deyə Bahçeli bildirib.
O, Azərbaycan Prezidenti İlham Əliyevlə Türkiyə Prezidenti Rəcəb Tayyib Ərdoğanın qarşıdakı zirvə toplantısında görüşünün iki ölkə arasındakı qardaşlıq münasibətlərinin sarsılmazlığını bir daha nümayiş etdirəcəyinə inandığını ifadə edib.
Bahçelinin sözlərinə görə, oktyabrın 29-30-da Ankarada keçiriləcək Türk Dövlətləri Təşkilatının 13-cü Zirvə Toplantısı tarixi əhəmiyyət daşıyır. Toplantı çərçivəsində təşkilata sədrliyin Azərbaycandan Türkiyəyə keçməsi nəzərdə tutulur.
MHP lideri Türkiyənin sədrliyi dövründə təhsil, elm, texnologiya, mədəniyyət, müdafiə sənayesi və iqtisadiyyat sahələrində əməkdaşlığın daha da gücləndirilməsinin vacibliyini qeyd edib.
O, dövlət qurumlarını, universitetləri, yerli idarəetmə orqanlarını və vətəndaş cəmiyyəti təşkilatlarını TDT-nin 2040-cı il üzrə Vizyon Sənədinə uyğun konkret layihələr hazırlamağa çağırıb.
Bahçeli İsmayıl Qaspıralının “Dildə, fikirdə, işdə birlik” prinsipinin bu gün də türk dövlətləri arasında əməkdaşlığın inkişafı üçün mühüm istiqamət olduğunu vurğulayıb.
“İstiqamətimiz aydındır: Başda Azərbaycan olmaqla, türk dünyası arasındakı qardaşlıq münasibətlərinə və mənəvi bağlara zərər vuracaq heç bir nifaq toxumunun aramıza səpilməsinə imkan vermədən, türk respublikalarının suverenliyinə və müstəqilliyinə qarşılıqlı hörmət əsasında əməkdaşlığımızı dərinləşdirmək və ortaq gələcəyimizi qurmaqdır”, – deyə MHP sədri bəyan edib.
Bahçeli əlavə edib ki, Türkiyə TDT-yə sədrliyi dövründə türk dünyasının birlik, həmrəylik və inkişaf hədəflərinə töhfə verməyə davam edəcək.
16:40 14.10.2026
Oxunuş sayı: 44
