İran–İsrail qarşıdurması 7-ci günündə: Raket xəstəxanaya düşdü, 65 yaralı var
İran–İsrail münaqişəsi yeddinci gününə daxil olub. İyunun 13-də İsrailin İrana qarşı başlatdığı hava əməliyyatları davam edir.
Crossmedia.az xarici mediaya istinadən bildirir ki, İran iyunun 19-da səhər saatlarında İsrailə 20-yə yaxın ballistik raket atıb. Raketlərdən biri Beerşeva şəhərində yerləşən “Soroka” Tibb Mərkəzinə düşərək birbaşa zərbə endirib. Hadisə nəticəsində xəsarət alanların sayı 65 nəfərə yüksəlib.
İsrailin fövqəladə hallar xidməti Magen David Adom (MDA) məlumat verib ki, yaralılardan üçünün vəziyyəti ağırdır, 18 nəfər isə sığınacaqlara qaçmağa çalışarkən xəsarət alıb.
İsrail: Xəstəxanaya hücum müharibə cinayətidir
İsrailin müdafiə naziri İsrael Katz bəyan edib ki, İranın ali dini lideri Əli Xamenei bu hücuma görə “günahlarına cavab verəcək”. O, İranın raket zərbələrini “qorxaqlıq” adlandıraraq bunların müharibə cinayəti olduğunu bildirib.
Nazir qeyd edib ki, Baş nazir Benyamin Netanyahu ilə birlikdə İranın strateji və hökumət obyektlərinə, o cümlədən Tehrandakı hədəflərə zərbələrin intensivliyini artırmaq əmri verilib.
İran: Hədəf xəstəxana deyil, hərbi obyektlər idi
İranın dövlət agentliyi IRNA raket hücumunu təsdiqləyib. Bildirilib ki, əsas hədəf xəstəxananın yaxınlığındakı IDF Kəşfiyyat Qərargahı və Qav-Yam Texnologiya Parkı olub. İran tərəfi xəstəxananın yalnız partlayış dalğasından zərər gördüyünü və əhalinin panikaya düşməməsini tövsiyə edib.
Tramp: ABŞ hərbi müdaxilə qərarı verməyib
ABŞ prezidenti Donald Tramp bildirib ki, ABŞ-ın münaqişəyə hərbi müdaxilə edib-etməməsi ilə bağlı hələ qərar verilməyib. O, İranın razılaşmaya gəlməli olduğunu deyərək əlavə edib:
“Əks halda, növbəti hücumlar daha qəddar olacaq.”
İran danışıqlara çağırır
İranın xarici işlər naziri Abbas Əraqçi ABŞ-ı hərbi əməliyyatların dayandırılması üçün diplomatik danışıqlara çağırıb. O, “Netanyahunu susdurmaq üçün Vaşinqtondan bir telefon zəngi kifayətdir” deyərək, bu addımın diplomatiyaya dönüşün başlanğıcı ola biləcəyini bildirib.
Nə baş vermişdi?
İsrail iyunun 13-də “Yüksələn Aslan” adlandırılan əməliyyat çərçivəsində İranın paytaxtı Tehrana hava zərbələri endirib. Hücum zamanı 200-ə yaxın döyüş təyyarəsi iştirak edib və 100-ə yaxın strateji hədəf vurulub. Zərbələr nəticəsində İranın nüvə proqramında çalışan yüksək rütbəli komandirlər və alimlər həlak olub.
İsrailin hücumundan sonra İran “Doğru söz” əməliyyatı çərçivəsində yüzlərlə raketlə cavab verib. Bir neçə raket Təl-Əviv və Qüds kimi şəhərləri vurub, bəziləri isə “Dəmir günbəz” müdafiə sistemini dəf edə bilib.
Zəhra Ağayeva
13:23 19.06.2025
Oxunuş sayı: 9931
