İsrail Ərak şəhərindəki nüvə reaktoruna hücum edib – İran: “Radiasiya təhlükəsi yoxdur”
İran dövlət televiziyası İsrailin Ərak şəhərində yerləşən ağırsu nüvə reaktoruna hücum etdiyini açıqlayıb. Bildirilir ki, hücum nəticəsində obyektə ziyan dəysə də, radiasiya sızması və ya ətraf mühitə yoluxma təhlükəsi yoxdur. İran tərəfi bu barədə əhalini sakitliyə çağırıb və obyektin təhlükəsizliyinin təmin olunduğunu bildirib.
Crossmedia.az xarici mediaya istinadən bildirir ki, İsrail hərbi rəhbərliyi hücumdan əvvəl Ərakda yerləşən nüvə obyektinə zərbə endiriləcəyinə dair xəbərdarlıq edib. Rəsmi Təl-Əviv yerli sakinlərə ərazini tərk etməyi tövsiyə edib. Hücum səhər saatlarında baş tutub və bölgədə qısa müddətli panika yaşanıb.
İran rəsmiləri bildirib ki, hücum nəticəsində reaktorun əsas strukturlarında ciddi dağıntı baş verməyib. Qeyd olunub ki, obyekt hazırda tam istismarda deyil və tikintinin son mərhələsindədir. Bununla belə, hadisə yerinə təhlükəsizlik qüvvələri və fövqəladə xidmətlər cəlb edilib.
Tehranın Beynəlxalq Atom Enerjisi Agentliyinə (MAQATE) verdiyi məlumata əsasən, Ərakdakı reaktorun gələn il istismara verilməsi planlaşdırılır. Bu obyekt İranın nüvə proqramında mühüm yer tutur və beynəlxalq müşahidəçilərin nəzarəti altındadır. Hücum MAQATE tərəfindən də izlənilir və təşkilat yaxın günlərdə rəsmi açıqlama verəcəyini bildirib.
Hazırda İran və İsrail arasında gərginlik daha da artmaqdadır. Tehran bu hücumu beynəlxalq hüququn pozulması kimi qiymətləndirir və cavab tədbirlərinin nəzərdən keçirildiyini bəyan edib. Beynəlxalq ictimaiyyət isə vəziyyətin daha da pisləşməməsi üçün hər iki tərəfi təmkinə çağırır.
Fatimə Nəbiyeva
12:13 19.06.2025
Oxunuş sayı: 10109
