“Türkiyənin sevinci – sevincimiz, dərdi – dərdimizdir” - DEPUTAT
Prezident İlham Əliyevin Türkiyəyə səfəri zamanı Kahramanmaraşda açılacaq "Azərbaycan məhəlləsi" iki qardaş ölkə arasındakı dostluq və həmrəylik münasibətlərinin canlı nümunəsidir. Azərbaycanın bu layihəyə verdiyi dəstək və diqqət, Türkiyə ilə qardaşlıq mövqeyini daha da möhkəmləndirir.
Kahramanmaraşdakı Azərbaycan məhəlləsinin açılışı və iki ölkə arasındakı qardaşlıq əlaqələri ilə bağlı Deputat Aydın Mirzəzadə Crossmedia.az-a açıqlama verib.
Aydın Mirzəzadə, iki il bundan əvvəl Türkiyədə baş verən dəhşətli zəlzələnin Azərbaycan cəmiyyətində də çox böyük ürək ağrısı ilə qarşılandığını vurğulayıb. A.Mirzəzadənin sözlərinə görə, zəlzələ zamanı nəticələrin aradan qaldırılması, insanların xilas edilməsi üçün Azərbaycandan göndərilən xilasedicilərin sayı Türkiyənin öz xilasedicilərindən sonra ikinci olub.
Deputat bildirib ki, Azərbaycan həmin dövrdə Türkiyəyə müxtəlif formalarda ümumilikdə bir milyard ABŞ dollarına qədər yardım göstərib. Onun sözlərinə görə, bu yardımlar yalnız ilkin yardım və xilasetmə işləri ilə məhdudlaşmayıb.
Aydın Mirzəzadə vurğulayıb ki, Azərbaycanın göstərdiyi ən böyük dəstək dağıdılmış şəhərlərin bərpasında birbaşa iştirakı məsələsi olub. “Türkiyənin bu şəhərlərin bərpası üçün əlbəttə ki, imkanı var idi. Amma bu proses təxminən on il çəkə bilərdi. Bu müddətdə isə yüz minlərlə türk ailəsi çətin şəraitdə yaşamalı olardı. Məhz buna görə də Azərbaycan bu işdə yaxından iştirak etmək qərarına gəldi” – deyə o bildirib.
Deputat qeyd edib ki, Azərbaycan Kahramanmaraşda böyük bir məhəllənin yenidən qurulması üzrə yüz milyon ABŞ dolları dəyərində bir layihəni həyata keçirməyi öz üzərinə götürüb. Onun sözlərinə görə, bu gün həmin məhəllənin açılışı baş tutur.
A.Mirzəzadənin sözlərinə görə, burada yalnız yaşayış binaları deyil, sosial obyektlər, məktəb, xəstəxana, eyni zamanda istirahət köşələri də yer alır. O bildirib ki, bu təşəbbüs Türkiyə-Azərbaycan dostluğunun və qardaşlığının bariz nümunəsidir.
Deputat deyib ki, Azərbaycan hər zaman Türkiyənin yanında olub və olacaq: “Türkiyənin sevinci – sevincimiz, dərdi – dərdimizdir".
Aydın Mirzəzadə vurğulayıb ki, bu layihə bir daha göstərdi ki, Azərbaycan və Türkiyə daim birlikdədir və bütün problemləri də birgə həll edirlər. O əlavə edib ki, bundan sonra da iki ölkə vaxtaşırı birgə layihələrin həyata keçirilməsi istiqamətində işləməkdə davam edəcək.
Deputat sonda bildirib ki, Prezident İlham Əliyevin Türkiyə Prezidenti ilə birlikdə Kahramanmaraşda yeni binalara köçən sakinlərə məhsul təqdim etməsi, türk dünyasının birliyini daha da möhkəmləndirəcək: “Bu hadisə dünya üçün iki qardaş ölkənin dostluğunun nəyə qadir olduğunu bir daha göstərəcək".
Fatimə Nəbiyeva
11:40 19.06.2025
Oxunuş sayı: 880
