ABŞ Avropaya təyyarədaşıyan gəmi yerləşdirəcək
ABŞ müdafiə nazirliyindən adının açıqlanmasını istəməyən rəsmi, ABŞ Hərbi Dəniz Qüvvələrinə məxsus “USS Gerald R. Ford” təyyarədaşıyan gəmisinin Avropaya yerləşdirilməsi planını təsdiqləyib.
Crossmedia.az xəbər verir ki, Anadolu Agentliyinə danışan amerikalı rəsminin sözlərinə görə, bu yerləşdirmə planı yeni qərar deyil və əvvəlcədən planlaşdırılmışdı. Gəlişmə İsrailin İrana qarşı hücumları və Tehranın cavab zərbələri fonunda baş verir.
CNN-ə danışan ABŞ rəsmiləri daha əvvəl gəminin gələn həftə İsrailə yaxın Şərqi Aralıq dənizinə göndərilməsinin gözlənildiyini bildirmişdilər.
ABŞ müdafiə naziri Pit Hegseth iyunun 16-da sosial media platformasında paylaşım edərək İsrail-İran gərginliyi fonunda regiona əlavə hərbi qüvvələrin göndərilməsi barədə göstəriş verdiyini açıqlamışdı. O, ABŞ qüvvələrinin təhlükəsizliyinin əsas prioritet olduğunu və bu yerləşdirmələrin müdafiə mövqelərinin gücləndirilməsi məqsədi daşıdığını bildirmişdi.
Müdafiə nazirliyindən digər bir vəzifəli şəxs isə həmin gün “USS Nimitz” təyyarədaşıyan gəmisinin Cənubi Çin dənizindən Orta Şərqə yönləndirildiyini təsdiqləmişdi.
İsrailin 13 iyunda İrana qarşı başladığı hərbi əməliyyatlar və İranın cavab zərbələri ilə bölgədə gərginlik artarkən, ABŞ-nin bu prosesə birbaşa daxil olub-olmayacağı məsələsi ölkə daxilində ciddi müzakirə olunur.
Mədinə Cəlilova
04:00 19.06.2025
Oxunuş sayı: 15956
