Vaşinqton Tehrana şərtlər irəli sürüb: Razılıq olmazsa, hərbi ssenari gündəmdədir
Diplomatik mənbələrin verdiyi məlumata görə, ABŞ administrasiyası İranla gərginliyin artmasının qarşısını almaq məqsədilə Tehrana bir sıra şərtlər təqdim edib.
Crossmedia.az xəbər verir ki, məlumata əsasən, bu şərtlər diplomatik kanallar vasitəsilə ötürülüb və İsrailin hərbi əməliyyatlara başlamaması, eləcə də ABŞ-nin birbaşa müdaxilədən yayınması ilə əlaqələndirilir.
Təklifə əsasən:
İran uranın zənginləşdirilməsini tam dayandırmalı, bütün nüvə obyektlərini sökməli və uran ehtiyatlarını üçüncü ölkəyə (ehtimal ki, Rusiyaya) təhvil verməlidir.
İran regiondakı proksi qruplaşmalara dəstəyi dayandırmalı və ballistik raket proqramından imtina etməlidir.
İran ordusunun miqyası azaldılmalı, İsrailə qarşı hərbi təhdidlərdən vaz keçilməli və dövlət doktrinasında İsrailin məhv edilməsi ilə bağlı ifadələr ləğv olunmalıdır.
Mənbə bildirir ki, İran bu şərtləri qəbul edərsə, sanksiyaların mərhələli şəkildə yumşaldılması, beynəlxalq bank sisteminə çıxış və neft ixracı imkanları bərpa edilə bilər.
Əks halda, ABŞ və İsrailin birgə hərbi əməliyyatlara başlama ehtimalı istisna edilmir. İran tərəfi hələlik bu təkliflərə rəsmi reaksiya verməyib.
23:35 18.06.2025
Oxunuş sayı: 679
