Asim Mollazadə: “Güclü iqtisadiyyat Azərbaycanın təhlükəsizliyinin və nüfuzunun əsas dayağıdır”
Prezident İlham Əliyev 30-cu “Caspian Oil and Gas”, 13-cü “Caspian Power” və 30-cu “Baku Energy Forum”un rəsmi açılış mərasimində çıxışında Azərbaycanın sabit iqtisadi sistemə malik olduğunu vurğulayaraq, bu sabitliyin ölkənin beynəlxalq aləmdə artan rolunda mühüm rol oynadığını qeyd edib. Azərbaycanda genişmiqyaslı islahatların həyata keçirildiyini söyləyən dövlətimizin başçısı xarici borcumuzun ümumdaxili məhsulun 7 faizini təşkil etdiyini vurğulayıb.
Məlum olduğu kimi, iqtisadiyyat hər bir dövlətin təməlidir. Bu baxımdan sabit iqtisadiyyat inkişaf üçün əsas şərtdir. Bu baxımdan Azərbaycanda hökm sürən davamlı iqtisadi inkişaf mühüm uğurdur.
Prezidentin səsləndirdiyi fikirlər barədə Crossmedia.az-a danışan Milli Məclisin deputatı Asim Mollazadə bildirib ki, iqtisadiyyat yalnız daxili rifahın göstəricisi deyil, eyni zamanda dövlətin müdafiə gücünün, siyasi çəkisinin və beynəlxalq nüfuzunun təməlidir: "Azərbaycan iqtisadi baxımdan son illər mühüm nailiyyətlər əldə edib və bu inkişaf təkcə neft sektoru ilə məhdudlaşmır. Azərbaycanın iqtisadi inkişafı ölkənin nüfuzunu və imkanlarını artırır. Eyni zamanda bu, təhlükəsizlik amilidir. Azərbaycan iqtisadiyyatın gücünə görə bölgənin ən böyük və ən müasir ordusunu qura bilir. Bu güclü ordu Azərbaycanı regionda aparıcı gücə çevirib və ölkənin qalib dövlət kimi mövqeyini möhkəmləndirib. Onun fikrincə, məhz iqtisadi dayanıqlıq Azərbaycanın müstəqil və balanslı xarici siyasət yürütməsinə, ərazi bütövlüyünü və suverenliyini bərpa etməsinə şərait yaradıb. Azərbaycan qalib ölkədir. Öz ərazi bütövlüyünü və suverenliyini bərpa edib, müstəqilliyini qoruyur. Bu isə güclü iqtisadiyyatsız mümkün olmazdı. Müstəqil iqtisadiyyatı olan dövlət xarici təsirlərdən asılı olmur və öz milli maraqlarını daha qətiyyətlə müdafiə edə bilir".
A. Mollazadə, həmçinin vurğulayıb ki, qeyri-neft sektorunun inkişafı da diqqət mərkəzindədir: "Bu sahədə aparılan islahatlar iqtisadiyyatın diversifikasiyasına, məşğulluğun artmasına və ölkənin uzunmüddətli iqtisadi sabitliyinə xidmət edir. Azərbaycan bu gün sabit və müasir iqtisadi modelə əsaslanan inkişaf yolu seçib. Bu, təkcə daxili siyasət üçün deyil, regionun sabitliyi üçün də vacib bir amildir".
Zəhra Ağayeva
12:41 02.06.2025
Oxunuş sayı: 7051
