ABŞ-ın sabiq prezidenti Co Baydenə sümüyə metastaz vermiş prostat xərçəngi diaqnozu qoyulub
ABŞ-ın sabiq prezidenti Co Baydenin aqressiv formada olan və sümüyə yayılmış prostat xərçəngindən əziyyət çəkdiyi məlum olub. Bu barədə onun ofisi bazar günü rəsmi açıqlama yayıb. Bildirilib ki, 82 yaşlı Baydenə keçən həftə sidik yollarında yaranan problemlə əlaqədar həkimə müraciət etdikdən sonra, cümə günü xərçəng diaqnozu qoyulub.
Crossmedia.az xarici mediaya istinadən bildirir ki, sabiq prezidentə qoyulan diaqnoz prostat xərçənginin yüksək dərəcəli formasını göstərir. Mütəxəssislər bu xəstəliyin Gleason şkalası üzrə 9 bal (maksimum 10 bal) ilə qiymətləndirildiyini, yəni xərçəngin sürətlə yayılmaq potensialına malik olduğunu bildiriblər. Baydenin ofisi əlavə edib ki, xəstəlik hormonlara həssasdır və bu səbəbdən müalicəsi mümkün hesab olunur.
Bayden və ailəsinin hazırda mümkün müalicə variantlarını nəzərdən keçirdiyi bildirilir. Məsələ ictimaiyyətə açıqlanandan sonra, sabiq prezidentə həm Demokratlar, həm də Respublikaçılar tərəfindən dəstək mesajları gəlib. ABŞ-ın indiki prezidenti Donald Tramp sosial platformasında paylaşım edərək Baydenin səhhəti ilə bağlı xəbərin onu və həyat yoldaşı Melaniyanı kədərləndirdiyini bildirib və Bayden ailəsinə tezliklə sağalma arzularını çatdırıb.
Sabiq vitse-prezident Kamala Harris isə X platformasında paylaşımında Co Baydeni “mübariz” adlandıraraq, onun bu çətinliyi də eyni güc və optimizmlə qarşılayacağına inandığını qeyd edib. ABŞ-ın sabiq prezidenti Barak Obama da Bayden və ailəsinə dəstəyini ifadə edərək, onun illərdir xərçəngə qarşı mübarizə sahəsində gördüyü işləri vurğulayıb: “Heç kim xərçənglə mübarizə üçün Co qədər çalışmayıb. Əminəm ki, bu problemi də əzmkarlıq və ləyaqətlə qarşılayacaq”.
Baydenin sağlamlığı ilə bağlı narahatlıqlar hələ ötən il gündəmə gəlmişdi. 2024-cü il prezident seçkilərində yenidən namizədliyini irəli sürən sabiq prezident, səhhəti və yaşı ilə bağlı tənqidlərə görə yarışdan geri çəkilmişdi. Onun yerinə Demokrat Partiyasından Kamala Harris namizəd göstərilmişdi.
Qeyd edək ki, prostat xərçəngi kişilər arasında dəri xərçəngindən sonra ən çox rast gəlinən ikinci xərçəng növüdür. ABŞ Xərçəng Cəmiyyətinə görə, bu xəstəlik sümüyə metastaz verdikdə, ümumiyyətlə sağalması mümkün sayılmır, lakin ilkin müalicəyə əksər hallarda müsbət cavab verilir. Həkimlər bildirir ki, Baydenin vəziyyətində hormonal müalicə və simptomların yüngülləşdirilməsi əsas üsullardandır.
Sabiq prezident son aylarda ictimai həyatdan qismən uzaqlaşmışdı. O, bu ilin aprelində əlillər üçün təşkil olunan bir konfransda çıxış etmiş, may ayında isə BBC-yə müsahibəsində prezidentlik yarışından çəkilməsinin “çətin bir qərar” olduğunu bildirmişdi. Bayden uzun illərdir xərçənglə mübarizəyə xüsusi önəm verib. 2015-ci ildə böyük oğlu Bo Baydeni beyin xərçəngindən itirən sabiq prezident 2022-ci ildə “xərçəng ayın enişi” (cancer moonshot) adlı təşəbbüsü yenidən işə salmışdı. Məqsəd 2047-ci ilə qədər xərçəngdən 4 milyondan çox ölümün qarşısını almaqdır.
Fatimə Nəbiyeva
12:15 19.05.2025
Oxunuş sayı: 914
