ABŞ rəsmisi: “İranın uranı bir faiz də zənginləşdirməsinə imkan verməyəcəyik”
ABŞ prezidentinin Yaxın Şərq üzrə xüsusi nümayəndəsi Stiv Uitkof İranın nüvə proqramı ilə bağlı kəskin açıqlama verib. Müsahibəsində Uitkof bildirib ki, Birləşmiş Ştatlar üçün nüvə danışıqlarındakı əsas qırmızı xətt İranın uranı zənginləşdirməsidir.
Crossmedia.az xarici mediaya istinadən bildirir ki, Uitkof ABŞ-ın bu məsələdə mövqeyinin dəyişməz olduğunu vurğulayıb: “Bizim çox aydın qırmızı xəttimiz var və bu zənginləşmədir. Biz bir faiz zənginləşdirmə potensialını belə qəbul edə bilmərik". Uitkofun bu bəyanatı Vaşinqtonun Tehranla nüvə razılaşmasına qayıtmaq məsələsində sərt yanaşma sərgilədiyini bir daha nümayiş etdirir.
ABŞ rəsmisinin bu açıqlaması İranın uranı zənginləşdirmə səviyyəsini artırdığı barədə yayılan məlumatların fonunda verilib. Vaşinqton administrasiyası İranın nüvə silahı əldə etmək ehtimalına qarşı ciddi addımlar atacağını dəfələrlə bəyan edib. Hazırda tərəflər arasında birbaşa danışıqlar olmasa da, beynəlxalq vasitəçilər nüvə sazişinin yenidən canlandırılması istiqamətində diplomatik səylər göstərirlər.
Fatimə Nəbiyeva
09:16 19.05.2025
Oxunuş sayı: 744
