Müstəqilliyin üzərinə kölgə salan rəmzlərə son: Azərbaycan öz tarixini özü yazır
Tarixə münasibət təkcə keçmişə baxış deyil bu, eyni zamanda gələcəyə verilən mesajdır. 9 May Faşizm üzərində Qələbə Günü dünya tarixi üçün əhəmiyyətli olsa da, bu qələbənin qeyd olunması hər ölkənin öz tarixi reallığı və milli kimliyi ilə ziddiyyət təşkil etməməlidir. Azərbaycanda ictimai tədbirlərdə SSRİ bayrağının qaldırılması və “Georgi lenti” kimi simvolların nümayişi yalnız nostalji deyil, həm də ictimai yaddaşa qarşı hörmətsizlik kimi qəbul olunur.
Bu simvollar Azərbaycanın yaddaşında minlərlə ailənin dağıdıldığı, milli iradənin boğulduğu, ərazi bütövlüyünün pozulduğu repressiv bir sistemin izlərini daşıyır. Belə rəmzlərin ictimai tədbirlərdə nümayişi cəmiyyətə təkcə yanlış mesaj vermir, həm də Azərbaycan xalqının keçdiyi ağrılı və şərəfli tarixi yaddan çıxarmağa xidmət edir. İmişlidə baş verən hadisə bir daha göstərdi ki, SSRİ rəmzlərinə qarşı ictimai həssaslıq yüksəkdir və bu həssaslıq tam haqlıdır.
Bu, sadəcə bir bayraq və lent məsələsi deyil. Bu, tarixi yaddaş uğrunda gedən mübarizədir. Bu, kimliyimizi müəyyən edən dəyərlərlə ziddiyyət təşkil edən simvollara qarşı milli iradənin cavabıdır. Faşizmə qarşı qazanılmış qələbəni qeyd etmək hər zaman alqışlanmalıdır, lakin bunu Azərbaycan xalqının azadlıq uğrunda mübarizəsini, müstəqillik yolunda tökdüyü qanı və qazandığı zəfəri kölgəyə salacaq şəkildə etmək yolverilməzdir.
Prezident İlham Əliyevin qətiyyətli və prinsipial liderliyi ilə Azərbaycan artıq başqasının qələmi ilə deyil öz qələmi ilə öz tarixini yazır. O, təkcə torpaqları azad etmədi, həm də milli yaddaşı, tarixi həqiqətləri və dövlətçilik düşüncəsini bərpa etdi. Bu gün Azərbaycan cəmiyyəti Prezidentin apardığı mübarizə fonunda daha ayıq, daha milli düşünür: artıq bizə yad olan, xalqımızın yaralarını qanadan simvollar üçün ölkəmizdə yer yoxdur.
Azərbaycan xalqı heç vaxt kiminsə keçmişini yaşamaq məcburiyyətində deyil. Bu gün Azərbaycan xalqı başqasının tarixini deyil, öz haqq savaşını, öz mübarizəsini və öz şanlı Zəfərini yaşamaqdadır. SSRİ simvolları ilə deyil, Xarıbülbül və üçrəngli bayraqla qürur duyur. Keçmişin kölgəsində deyil, gələcəyin işığında irəliləyir.
Prezident İlham Əliyevin siyasi iradəsi və sarsılmaz liderliyi ilə Azərbaycan təkcə müstəqilliyini qorumaqla kifayətlənmir o, həm də xalqın milli kimliyini təhrif edən simvolları tarixin arxivinə göndərərək yeni bir epoxanın əsasını qoyur. Bu epoxa güclü dövlətçilik, azad düşüncə və xalqın öz taleyinə sahib çıxmaq haqqı üzərində qurulur.
Və ən əsası Azərbaycan artıq başqasının tarixini yaşamır. Azərbaycan öz tarixini özü yazır. Qürurla, cəsarətlə, Zəfərlə!
Həmayıl Şükürlü
22:24 13.05.2025
Oxunuş sayı: 688
