Zelenski: “Rusiya nəhayət atəşkəs barədə düşünür..."
Ukrayna Prezidenti Volodimir Zelenski Rusiya tərəfinin atəşkəs məsələsini nəzərdən keçirməsini müsbət addım kimi dəyərləndirib. Dövlət başçısı bu barədə çıxışında bildirib ki, Rusiyanın müharibəni dayandırmaq barədə düşünməsi dünya ictimaiyyətinin uzun zamandır gözlədiyi bir prosesin başlanğıcı ola bilər. O, atəşkəsin istənilən münaqişənin dayandırılması üçün ilkin və vacib mərhələ olduğunu vurğulayıb.
Crossmedia.az xarici mediaya istinadən bildirir ki, Prezident Zelenski çıxışı zamanı qeyd edib: “Bu, yaxşı siqnaldır ki, ruslar nəhayət bu müharibəni bitirmək haqqında düşünməyə başlayıblar. Bütün dünya bu qərarı uzun müddətdir gözləyirdi. Real sülhə doğru atılan ilk və əsas addım atəşkəsdir. Müharibənin davam etməsinin, insanların həyatını itirməsinin, şəhərlərin dağıdılmasının heç bir mənası yoxdur. Hətta bir gün belə bu ölümlərin davam etməsi yolverilməzdir.”
Zelenski həmçinin bildirib ki, Ukrayna tərəfi Rusiyanın bu istəyi rəsmi şəkildə təsdiqləyəcəyinə ümid edir. Onun sözlərinə görə, sabah – 12 may tarixindən etibarən tam, davamlı və etibarlı bir atəşkəsin elan olunması gözlənilir: “Əgər bu baş verərsə, Ukrayna sülh üçün danışıqlara başlamağa və görüş keçirməyə tam hazırdır.”
Zelenskinin bu açıqlaması Rusiya-Ukrayna müharibəsinin gedişində yeni bir mərhələnin başlanğıcı kimi qiymətləndirilir. Xatırladaq ki, müharibə 2022-ci ilin fevralında başlayıb və bu günə qədər minlərlə insanın ölümünə, milyonlarla insanın isə evsiz qalmasına səbəb olub. Münaqişənin diplomatik yolla həll olunması üçün beynəlxalq ictimaiyyət dəfələrlə çağırışlar etsə də, indiyədək tərəflər arasında sabit və rəsmi bir atəşkəs əldə olunmayıb. Bu baxımdan, Zelenskinin son çıxışı və Rusiyanın mövqeyindəki mümkün dəyişiklik sülh istiqamətində atılan ilk real addım ola bilər.
Fatimə Nəbiyeva
22:30 11.05.2025
Oxunuş sayı: 10127
