Trampdan gözlənilməz dəstək: “İstəklilər koalisiyası” Ukrayna üçün güclənir
ABŞ Prezidenti Donald Tramp bir neçə ölkə liderinin Kiyevdə müzakirə etdiyi Ukrayna ilə bağlı “istəklilər koalisiyası” təşəbbüsünü dəstəkləməyə razılaşıb.
Crossmedia.az “Politico”ya istinadən xəbər verir ki, Kiyevdə keçirilən görüşdə iştirak edən iki avropalı rəsmi, danışıqları böyük uğur kimi qiymətləndirib.
Onların sözlərinə görə, əsas uğur Trampın bu təşəbbüsə dəstəyinin təmin olunması olub.
Lakin rəsmilərdən biri qeyd edib ki, ABŞ prezidenti tez-tez mövqeyini dəyişmək meyli ilə tanınır.
Avropa liderləri Rusiyaya ilkin şərt olmadan 30 günlük atəşkəslə razılaşmaq üçün təzyiqin artırılmasını təklif ediblər. Əgər bu baş verməzsə, Moskva əleyhinə yeni sanksiyaların tətbiqi və Ukraynaya hərbi dəstəyin gücləndirilməsi gündəmə gələcək.
Məlumata görə, Fransa Prezidenti Emmanuel Makron Trampla telefon əlaqəsi saxlayıb. ABŞ lideri zəngə cavab verərək, Avropanın təkliflərini dəstəklədiyini bildirib.
20:41 11.05.2025
Oxunuş sayı: 10327
