Türkiyə İordaniya və Suriya ilə üçtərəfli görüşə ev sahibliyi edəcək
Türkiyə sabah Ankarada İordaniya və Suriya XİN rəhbərlərinin iştirakı ilə üçtərəfli görüşə ev sahibliyi edəcək.
Crossmedia.az "Haber Global"a istinadən xəbər verir ki, toplantıda regional təhlükəsizlik və əməkdaşlıq məsələlərinin geniş şəkildə müzakirə olunması planlaşdırılır.
Görüşə Türkiyənin xarici işlər naziri Hakan Fidan sədrlik edəcək. Toplantıda İordaniyanın baş nazir müavini, xarici işlər və xaricdə yaşayan iordaniyalılar naziri Ayman Safadi və Suriya xarici işlər naziri Esad Həsən Şeybani iştirak edəcək.
Diplomatik mənbələrin məlumatına görə, Hakan Fidan toplantıda Türkiyənin Suriyada təhlükəsizlik və sabitliyin təmininə yönəlmiş səylərini dəstəklədiyini vurğulayacaq.
O, həmçinin İsrailin Suriyaya və regiondakı digər ölkələrə qarşı həyata keçirdiyi təcavüzkar siyasətin dayandırılmasının vacibliyini önə çəkəcək.
Fidan çıxışında “regional problemlərə regional həll yolları” prinsipinə istinad edərək, bölgə ölkələri arasında əməkdaşlıq və terrorizmlə mübarizədə həmrəyliyin zəruriliyinə diqqət çəkəcək.
Toplantı çərçivəsində Hakan Fidanın iordaniyalı və suriyalı həmkarları ilə ayrıca ikitərəfli görüşlər keçirməsi də nəzərdə tutulur.
Aybəniz Səfərova
17:11 11.05.2025
Oxunuş sayı: 9678
