Tramp Putinin Ukrayna ilə danışıqlar təklifini müsbət dəyərləndirdi
ABŞ-nin prezidenti Donald Tramp Rusiya Prezidenti Vladimir Putinin Ukrayna ilə birbaşa danışıqlara dair təklifini şərh edərək, bunu potensial olaraq “əlamətdar gün” adlandırıb.
Crossmedia.az xarici mediaya istinadən xəbər verir ki, Tramp öz açıqlamasında bildirib:
“Rusiya və Ukrayna üçün potensial əlamətdar gün! Bu sonsuz ‘qan gölməçəsi’ ümid etdiyimiz kimi sona çatarsa, yüz minlərlə insanın xilas ediləcəyini düşünün. Bu, tamamilə yeni və daha yaxşı dünya olacaq. Bunun baş verəcəyinə əmin olmaq üçün hər iki tərəflə işləməyə davam edəcəyəm”.
Trampın bu açıqlaması onun davam edən diplomatik təşəbbüslərlə bağlı mövqeyini nümayiş etdirir. Prezident daha əvvəl də Ukrayna müharibəsinin qısa zamanda bitə biləcəyini iddia etmiş və vasitəçilik rolunu oynamağa hazır olduğunu bildirmişdi.
Ekspertlər Trampın açıqlamasını ABŞ-də qarşıdan gələn seçkilər ərəfəsində beynəlxalq arenada fəallığını artırmaq cəhdi kimi qiymətləndirirlər.
Mədinə Cəlilova
13:17 11.05.2025
Oxunuş sayı: 12119
