İsrail qırıcı təyyarəsi daşıdığı bombanı texniki nasazlıq səbəbilə yerə atdı
İsrail ordusuna məxsus qırıcı təyyarə texniki nasazlıq səbəbilə daşıdığı bombanı ölkənin şimalına atıb.
Crossmedia.az xəbər verir ki, İsrail Ordusunun sözçüsü Aviçay Adraee, X platformasında yayımladığı açıqlamada, bir İsrail qırıcı təyyarəsinin texniki problem səbəbilə daşıdığı mühimmatı atdığını bildirib. Təyyarənin təhlükəsiz eniş etmək məqsədilə nəzarətli şəkildə mühimmatı boşaltmaq istədiyini qeyd edən Adraee, bombanın ölkənin şimalındakı bir əraziyə düşdüyünü deyib.
Adraee, mühimmatın yerə düşməsinə texniki nasazlığın səbəb olduğunu və hadisə ilə bağlı araşdırma başladıldığını açıqlayıb.
Qeyd edək ki, 15 aprel tarixində də İsrail Hərbi Hava Qüvvələrinə məxsus bir qırıcı texniki nasazlıq səbəbilə Qəzza zolağındakı hədəf əvəzinə, sərhədə yaxın yerləşən İsrailin Nir Yitzhak bölgəsini vurmuşdu. Həmin bombanın boş əraziyə düşdüyü, hadisə nəticəsində ölən və ya yaralanan olmadığı və araşdırma aparıldığı bildirilmişdi.
Bu hadisə ilə birlikdə İsrailə məxsus qırıcı təyyarələr bir ay ərzində ikinci dəfə texniki nasazlıq səbəbilə mühimmat itirmiş oldu.
Mədinə Cəlilova
10:53 11.05.2025
Oxunuş sayı: 8656
