Kiyevdə sülh sammiti: 30-dan çox ölkə atəşkəsə razıdır
Bu gün Ukraynanın paytaxtı Kiyevdə Böyük Britaniya, Fransa, Almaniya və Polşa liderlərinin iştirakı ilə beynəlxalq sammit keçirilib.
Crossmedia.az xəbər verir ki, bu barədə Ukrayna Prezidenti Volodimir Zelenski sosial hesabında məlumat verib.
O, bu formatı “Birləşmiş Avropanın nümunəsi” adlandıraraq, sammitin əsas məqsədinin sülhə və uzunmüddətli təhlükəsizliyə nail olmaq olduğunu bildirib.
Prezidentin sözlərinə görə, görüşə onlayn formatda Avropa İttifaqı və NATO nümayəndələri də daxil olmaqla 30-dan çox ölkənin lideri qatılıb. Müzakirələr zamanı atəşkəslə bağlı ortaq və aydın mövqe formalaşıb.
Zelenski qeyd edib ki, əsas nəticə quruda, havada və dənizdə tam şərtsiz, 30 günlük atəşkəslə bağlı razılaşmanın əldə olunmasıdır. Onun fikrincə, bu addım diplomatik həll yoluna real imkan yaradır.
Ukrayna Prezidenti həmçinin ABŞ-la əməkdaşlığın davam etdiyini və Prezident Donald Trampın komandası ilə məhsuldar dialoqun qurulduğunu vurğulayıb.
Sammitin sonunda liderlər əlavə müzakirələr apararaq gələcək fəaliyyətlə bağlı razılığa gəliblər.
Zelenski atəşkəsi dəstəkləyən bütün tərəflərə təşəkkür edib və bu prosesi pozan tərəfin məsuliyyət daşımalı olduğunu bildirib.
Qeyd edək ki, "Qətiyyətlilərin koalisiyası" liderləri Kiyevdə görüşdən sonra ABŞ Prezidenti Donald Trampa zəng edərək Ukrayna tərəfinin mayın 12-dən etibarən atəşkəsə hazır olduğunu bildiriblər.
Aybəniz Səfərova
18:23 10.05.2025
Oxunuş sayı: 9187
