Çin Ukraynada döyüşən vətəndaşları ilə bağlı iddiaları inkar edir
Ukrayna prezidenti Vladimir Zelenskinin Çinə yönəltdiyi ittihamlar Pekinin sərt reaksiyasına səbəb olub. Zelenski bəyan edib ki, Ukrayna ərazisində Rusiya ordusu ilə yanaşı döyüşən azı 155 Çin vətəndaşına dair sübutlar mövcuddur. Lakin Çin bu iddiaları qəti şəkildə rədd edir.
Crossmedia.az xarici mediaya istinadən bildirir ki, Çin Xarici İşlər Nazirliyinin sözçüsü Lin Jian Pekində keçirdiyi mətbuat konfransında Zelenskinin açıqlamalarını “məsuliyyətsiz bəyanatlar” kimi qiymətləndirib. O bildirib ki, Çin hökuməti öz vətəndaşlarına xarici münaqişələrdən uzaq durmağı tövsiyə edir və onlara hərbi əməliyyatlarda iştirak etməməyi dəfələrlə xatırladıb.
Zelenski çərşənbə günü Ukrayna ordusunun döyüş meydanında iki Çin vətəndaşını əsir götürdüyünü açıqlayıb. O deyib ki, Rusiya Çin vətəndaşlarını muzdlular kimi müharibəyə cəlb edir və Pekin bu kampaniyadan xəbərdardır. Lakin prezident iddialarını sübut edən konkret sənəd və ya vizual dəlil təqdim etməyib.
Ukrayna tərəfi 155 Çin vətəndaşının ad, soyad və pasport məlumatlarına sahib olduqlarını bildirir. Zelenskinin sözlərinə görə, bu rəqəm daha da yüksək ola bilər və Çin hökuməti Rusiyanın bu fəaliyyətlərinə qarşı tədbir görməlidir. Çin isə hələlik bu məlumatlara rəsmi cavab verməyib, lakin Ukraynanın açıqlamalarını siyasi gərginliyi artıran addım kimi dəyərləndirib.
Fatimə Nəbiyeva
18:08 10.04.2025
Oxunuş sayı: 7061
