Trampın vergi qərarı ən zəngin 10 milyarderin sərvətini 135 milyard dollar artırıb
ABŞ prezidenti Donald Trampın tarif siyasətində verdiyi yumşalma qərarı birjalarda ciddi yüksəlişə səbəb olub. Tramp ötən həftə açıqlamasında Çindən başqa bütün ölkələrə tətbiq edilən yüksək gömrük rüsumlarının 90 gün ərzində 10 faiz baza səviyyəsinə endiriləcəyini bildirib. Bu qərardan sonra dünyanın ən zəngin 10 adamının sərvəti cəmi bir gündə 135,33 milyard dollar artıb.
Crossmedia.az xarici mediaya istinadən bildirir ki, Tramp çərşənbə günü Ağ Evdəki Oval Ofisdə keçirdiyi mətbuat konfransında gömrük rüsumlarının yeni qaydalarını elan edib. Belə ki, bundan sonra ABŞ, əvvəlki kimi, yüksək vergi tətbiq etdiyi ölkələrə 90 gün müddətində yalnız 10 faizlik tarif tətbiq edəcək. Çin isə bu istisnadan faydalanmayacaq və onun üçün 124 faizlik rüsum qüvvədə qalacaq.
Trampın açıqlaması birjalarda ani yüksəlişə səbəb olub. Bu yüksəlişdən isə ən çox faydalanan şəxs Tesla-nın baş direktoru və Trampın yaxın müttəfiqi İlon Mask olub. O, bir gündə 35,9 milyard dollar gəlir əldə edərək günün ən çox qazanan milyarderi olub. Meta-nın rəhbəri Mark Zukerberq isə 25,8 milyard dollar, Amazon-un qurucusu Ceff Bezos 18,5 milyard dollar, Oracle və Tesla investorlarından Larri Ellison 15,5 milyard dollar, məşhur investor Uorren Baffet 8,12 milyard dollar, Microsoft-un qurucusu Bill Qeyts isə 4,81 milyard dollar qazanc əldə edib.
Fransalı milyarder, LVMH-in sahibi Bernard Arnault isə birjada baş verən ümumi artıma baxmayaraq, 5,7 milyard dollar itki ilə geriləyən yeganə şəxs olub.
Bununla belə, dünyanın ən varlı 10 adamı ümumilikdə hələ də bu il ərzində zərərdədir. Onlar 2025-ci ilin əvvəlindən indiyədək cəmi 244,36 milyard dollar itiriblər. Trampın bu qərarının müvəqqəti yüksəlişə səbəb olduğu, lakin qlobal iqtisadi qeyri-müəyyənlik fonunda sərvətlərin davamlı artıb-artmayacağı hələ də sual altındadır.
Zəhra Ağayeva
18:00 10.04.2025
Oxunuş sayı: 6315
