Çin ABŞ-ın yeni tarif qərarlarına sərt reaksiya verdi
Çin Xarici İşlər Nazirliyi ABŞ-ın ticarət tarifləri ilə bağlı qərarına münasibət bildirib. Crossmedia.az xarici KİV-ə istinadən xəbər verir ki, rəsmi Pekin bəyan edib ki, “tarif müharibələrində qalib olmur” və bu cür addımlar “nə ölkələrin maraqlarına xidmət edir, nə də xalqlara fayda gətirir”.
Nazirlik vurğulayıb:
“Çin münaqişə istəmir, lakin əgər yolumuzu kəsirlərsə, geri çəkilməyəcəyik. Beynəlxalq ticarət qaydalarının pozulmasına səssiz qalmayacağıq.”
Digər tərəfdən, Çin Ticarət Nazirliyi də Vaşinqtonun mümkün ticarət müharibəsi seçiminə sərt cavab verib:
“Əgər ABŞ bu yolu seçərsə, Çin sona qədər mübarizə aparacaq. Təzyiq, təhdid və şantaj bizimlə mübarizə üsulu ola bilməz.”
Rəsmi Pekin bu mövqe ilə beynəlxalq ticarət qaydalarının qorunması və iqtisadi suverenliyin müdafiəsi istiqamətində iradəsini bir daha nümayiş etdirib.
13:35 10.04.2025
Oxunuş sayı: 5725
