Pentaqon rəhbəri: ABŞ Panama kanalını Çin təsirindən çıxarmaqda israrlıdır
ABŞ müdafiə naziri (Pentaqon rəhbəri) Pit Hegset Panama səfəri çərçivəsində çıxış edərək, ölkəsinin Panama kanalını Çin təsirindən çıxarmağa qətiyyətli olduğunu bəyan edib.
Crossmedia.az xəbər verir ki, nazir bu barədə sosial şəbəkə X hesabında məlumat verib.
Hegset qeyd edib ki, son 20 ildə Panamaya səfər edən ilk ABŞ müdafiə naziridir.
"Qəti şəkildə demək istəyirəm: Çin bu kanalı inşa etməyib. Çin bu kanalı idarə etmir və Çin bu kanaldan silah kimi istifadə edə bilməyəcək. Panamanın rəhbər rolu ilə və həmfikirlərimizlə birlikdə biz bu kanalın təhlükəsizliyini və bütün millətlər üçün əlçatanlığını təmin edəcəyik. Bunu isə dünyanın ən güclü, ən effektiv və ən ölümcül hərbi gücü ilə həyata keçirəcəyik", - o söyləyib.
Hegset Panamanın prezidenti Xose Raul Mulino və ictimai təhlükəsizlik naziri Frənk Abrego ilə də görüş keçirib. O bildirib ki, təhlükəsizlik sahəsində əməkdaşlığın gücləndirilməsi hər iki ölkənin təhlükəsizliyinə, qüdrətinə və rifahına töhfə verəcək: “ABŞ və Panama ortaq təhlükəsizlik çağırışları və təhdidlərlə qarşı-qarşıyadır. Biz bu təhdidlərin qarşısını birlikdə alacaq, müdafiəmizi gücləndirəcək və güc yolu ilə sülhə nail olacağıq”.
Xatırladaq ki, bundan əvvəl ABŞ Prezidenti Donald Tramp da Panama kanalına nəzarətin qaytarılmasına dair niyyətini ifadə etmişdi. O, bu qərarını Amerika gəmiləri üçün tətbiq olunan yüksək tariflər və regionda Çinin artan nüfuzu ilə əsaslandırmışdı.
Panama tərəfi isə ölkənin kanal üzərində tam suverenliyə malik olduğunu və bütün əməliyyatların Panama Kanalı Administrasiyası tərəfindən həyata keçirildiyini vurğulayır. Prezident Xose Raul Mulino da bəyan edib ki, ölkə kanala nəzarəti heç bir başqa dövlətə vermək niyyətində deyil.
Xumar Emilqızı
16:45 09.04.2025
Oxunuş sayı: 7390
