Trampın yeni tarifləri Avropa bazarlarını silkələdi
ABŞ Prezidenti Donald Trampın Çin mallarına tətbiq etdiyi yeni tariflərin qüvvəyə minməsi ilə Avropa bazarlarının çərşənbə günü enişlə açılması gözlənilir. ABŞ Gömrük və Sərhəd Mühafizəsi artıq 86 ölkədən idxal olunan məhsullara rüsum toplamağa hazırlaşır.
Crossmedia.az xarici mediaya istinadən bildirir ki,Tramp Çinlə danışıqlara açıq olduğunu desə də, 2 maydan etibarən bəzi Çin mallarına tarifləri 90 faizə yüksəldəcək fərmanı imzalayıb. Çin isə bu addımlara qarşı sona qədər mübarizə aparacağını bildirib.
Asiya bazarlarında da ciddi itkilər müşahidə olunub. Honq-Konqun Hang Seng indeksi 2%, Yaponiyanın Nikkei 225 indeksi 4%, Cənubi Koreyanın Kospi indeksi 1,7% dəyər itirib. ABŞ fyuçers bazarlarında da S&P 500, Nasdaq və Dow Jones indeksi 2%-dən çox ucuzlaşıb.
Trampın tarif siyasəti fonunda təhlükəsiz aktivlərə maraq artıb – qızılın qiyməti 3018 dollara yüksəlib, avro və Yapon yeni isə dəyər qazanıb. Neft bazarlarında isə Brent və WTI markalı neftin qiymətləri 2021-ci ildən bəri ən aşağı səviyyəyə düşüb.
Zəhra Ağayeva
14:00 09.04.2025
Oxunuş sayı: 1769
