Hizbullah 12 ölkədə aktiv şəbəkə qurub – əsas dəstəkçisi isə İrandır
Hizbullah təşkilatının əsas silah, maliyyə və logistika mənbəyi İran olaraq qalmaqda davam edir.
Crossmedia.az xəbər verir ki, bu barədə xarici KİV məlumat yayıb.
Bildirilib ki, buna baxmayaraq, beynəlxalq təhlükəsizlik qurumlarının son illərdəki hesabatlarına əsasən, təşkilat 1990-cı illərdən bəri fəaliyyət dairəsini genişləndirərək Avropa, ABŞ, Latın Amerikası və Asiyada aktiv şəbəkə formalaşdırıb: “ABŞ-da 2017-ci ildə Latın Amerikası ölkələrindən gələn və Nyu York şəhərində terror aktına hazırlaşan üç Hizbullah hücrəsinə qarşı əməliyyat keçirilmişdi. 2023-cü ildə isə Braziliyada təşkilatın ölkədəki yəhudi icmalarına qarşı genişmiqyaslı hücum planladığı aşkarlanmış və təhlükəsizlik qüvvələri əməliyyat iştirakçılarını saxlamışdı”.
Məlumata görə, Hizbullah hazırda Latın və Orta Amerikada 12 ölkədə geniş maliyyə və terror şəbəkəsinə malikdir. Lakin bu ölkələrdən yalnız dördü – Argentina, Kolumbiya, Honduras və Paraqvay – Hizbullahı rəsmi olaraq terror təşkilatı kimi tanıyır: “Bundan əlavə, təşkilatın bəzi ölkələrdə yeraltı cinayət qrupları ilə, eləcə də Venesuelada dövlət aparatındakı yüksək səviyyəli şəxslərlə əlaqədə olduğu bildirilir. Venesuelalı vəzifəli şəxslərdən Tarık Zeydan Əl-Aysami və Adil Əl-Zübeyirin Hizbullah adından narkotik qaçaqmalçılığı ilə məşğul olduqları iddia olunur. Eyni zamanda, Venesuelanın dövlətə məxsus hava yolları şirkəti olan CONVIASA vasitəsilə İrandan təşkilat üzvlərinin ölkəyə gətirildiyi və Tehrana qeyri-qanuni yüklərin daşındığı vurğulanır”.
Aydan Quliyeva
21:18 08.04.2025
Oxunuş sayı: 1960
