ABŞ hökumətində yeni qurum süni intellektlə Trampa qarşı mövqeləri izləyir
ABŞ hökumətinin effektivliyinin artırılması üçün yaradılmış yeni qurum – DOGE (Department of Government Efficiency) milyarder İlon Maskın nəzarətində fəaliyyət göstərir. Qurum süni intellekt texnologiyalarından istifadə edərək Ətraf Mühitin Mühafizəsi Agentliyinin (EPA) əməkdaşlarının daxili yazışmalarını təhlil edir. Məqsəd – Prezident Donald Trampa və onun siyasətinə qarşı yönəlmiş neqativ münasibətləri müəyyənləşdirməkdir.
Crossmedia.az xəbər verir ki, bu barədə Reuters agentliyi mənbələrə istinadən məlumat yayıb.
Məlumata görə, DOGE əməkdaşları Microsoft Teams kimi platformalarda aparılan daxili yazışmaları izləmək üçün "Grok" adlı çat-botda istifadə olunan süni intellekt texnologiyalarını tətbiq edirlər. Kibertəhlükəsizlik üzrə mütəxəssislər bu tendensiyadan narahat olduqlarını bildirirlər. Onların fikrincə, bu texnologiya Tramp administrasiyasının siyasi maraqlarının irəli sürülməsi və ya məxfi məlumatlara çıxış əldə edilməsi üçün istifadə oluna bilər.
Agentliyin mənbələri qeyd edirlər ki, DOGE əməkdaşları iş prosesində Google Docs və Signal kimi qorunmamış kommunikasiya vasitələrindən istifadə edirlər. Bu isə ABŞ-nin dövlət sirri haqqında qanunvericiliyinə zidd ola bilər.
Qeyd edək ki, Donald Tramp prezident vəzifəsinə başladıqdan sonra DOGE dövlət xərclərinin genişmiqyaslı yoxlanışına başlayıb. İlon Maskın sözlərinə görə, qurum büdcə xərclərini 2 trilyon dollar azaltmağı planlaşdırır.
Fatimə Məmmədova
20:12 08.04.2025
Oxunuş sayı: 7280
