Trampın rəsmi portretini çəkən rəssam biznesini itirmək təhlükəsi ilə üzləşib
ABŞ Prezidenti Donald Trampın portretini çəkmiş britaniyalı rəssam Sara Bordman, Trampın sərt tənqidlərindən sonra 41 illik sənət fəaliyyətinin təhlükə altında olduğunu bildirib.
Crossmedia.az xəbər verir ki, bu barədə "Sky News" yazıb.
2019-cu ildə Kolorado ştatının qanunverici orqanında asılmış portreti Tramp mart ayının sonunda “qəsdən təhrif olunmuş” adlandırmışdı.
O, sosial media platforması “Truth Social”-da paylaşım edərək Bordmanın çəkdiyi portretə qarşı sərt tənqidlər səsləndirmiş, onu “indiyə qədərki ən pis” portret adlandırmışdı. Tramp eyni rəssamın sabiq prezident Barak Obama üçün çəkdiyi portreti "möhtəşəm" adlandırsa da, öz portreti ilə bağlı "o, yaşlandıqca istedadını itirib" deyərək rəssamı aşağılamışdı. Portret artıq Kolorado Dövlət Kapitoliyindən yığışdırılıb. Sara Bordman Sky News-a verdiyi açıqlamada bildirib: “Prezident Tramp öz fikrini sərbəst şəkildə ifadə edə bilər, lakin məni portreti qəsdən təhrif etməkdə ittiham etməsi və yaşlandıqca istedadımı itirdiyimi deməsi birbaşa və mənfi şəkildə biznesimə təsir edib. 41 ildən artıqdır qurduğum fəaliyyətim indi bərpa olunmayacaq dərəcədə təhlükə altındadır.”
Bordman vurğulayıb ki, portret altı il ərzində Kolorado Dövlət Kapitolisinin Rotunda zalında nümayiş olunub və bu müddət ərzində əsasən müsbət rəylər alıb. Lakin Trampın açıqlamasından sonra vəziyyət kəskin şəkildə dəyişib.
Rəssam bildirib ki, portret Kolorado Dövlət Kapitoli Məsləhət Komitəsinin sifarişi ilə çəkilib və onun əsəri mərhələli şəkildə komitə tərəfindən təsdiqlənib.
“Portreti müqaviləyə uyğun olaraq çəkmişəm. Orada nə siyasi qərəz, nə də karikatura elementləri var idi,” – deyə Sara Bordman bildirib.
O, hazırda ictimai reaksiyaların və Trampın tənqidinin işgüzar nüfuzuna ciddi zərbə vurduğunu qeyd edib.
Fatimə Məmmədova
21:02 07.04.2025
Oxunuş sayı: 760
