Aİ ABŞ rüsumlarına cavab tədbirlərini müzakirə edir – Avropa və Asiyadan sərt reaksiyalar
Avropa İttifaqı bu gün ABŞ-nin polad və alüminium məhsullarına tətbiq etdiyi rüsumlara cavab olaraq, hansı ABŞ məhsullarına qarşı rüsum tətbiq ediləcəyini müzakirə edir. Crossmedia.az xəbər verir ki, bu barədə İspaniyanın İqtisadiyyat naziri açıqlama verib.
Almaniyanın İqtisadiyyat naziri Robert Habek bildirib ki, Aİ ABŞ tariflərinə cavab vermək üçün güclü mövqeyə sahibdir. Onun sözlərinə görə, cavab sakit və vahid şəkildə olmalı, lakin zəiflik göstərilməməlidir: “İlon Maskın Aİ ilə sıfır rüsum təklifi zəiflik və qorxu əlamətidir. O, Tramp ilə danışmalıdır.” Habek əlavə edib ki, Aİ-nin cavab tədbirləri ABŞ-ə zərər vuracaq və bu məsələdə seçiciliyə yer yoxdur.
Almaniya: Trampın bəyanatı ticarət siyasətinə hücumdur
Almaniya İqtisadiyyat Nazirliyi Trampın son açıqlamasını “qlobal ticarət siyasətinə hücum” adlandırıb. Almaniyanın yeni kansleri Fridrix Merz isə xəbərdarlıq edib ki, beynəlxalq səhm və istiqraz bazarlarında vəziyyət artıq dramatikdir və daha da pisləşmək təhlükəsi yaranıb.
Yaponiyanın Baş naziri İşiba bir neçə saatdan sonra ABŞ prezidenti Donald Trampla telefon danışığı aparacaq. Çin Xarici İşlər Nazirliyi isə ABŞ-nin təhdid və təzyiq yolunu seçməsini tənqid edərək, bunun Çinlə düzgün davranış forması olmadığını bildirib.
Aİ-nin cavab tədbirlərinə dair yekun qərarın aprelin 9-da açıqlanacağı gözlənilir. Avropa və Asiya ölkələrinin sərt reaksiyaları isə Trampın ticarət siyasətinin beynəlxalq səviyyədə ciddi narahatlığa səbəb olduğunu göstərir.
Mədinə Cəlilova
20:13 07.04.2025
Oxunuş sayı: 6980
