Polkovnik Qərb koalisiyasının qoşunlarının Ukraynada yerləşdirilməsi üçün şərti açıqlayıb
Keçmiş sülhməramlı missiyaların iştirakçısı, polkovnik Sergey Grabski Ukraynada xarici hərbi qoşunların yerləşdirilməsinin mümkün olmadığına dair kəskin açıqlama verib. Qeyd olunub ki, bu, Rusiyanın sərt müqaviməti ilə əlaqədardır.
Crossmedia.az-ın xəbərinə görə, Grabski Ukrayna radiosuna verdiyi müsahibədə bildirib ki, Rusiya xarici hərbi qoşunun Ukrayna ərazisində olmasına qarşıdır.
Onun sözlərinə görə, Ukraynada vəziyyət iki fərqli reallıqdan ibarətdir: "Bir reallıqda ABŞ bu müharibəni dayandırmağa çalışır, digər reallıqda isə biz fiziki olaraq məhv edilmək istəyən bir düşmənlə mübarizə aparırıq."
Grabski, həmçinin müttəfiq ölkələrin Ukraynada xarici hərbi qoşun yerləşdirmə planlarını şərh edərkən bildirib ki, bu məsələyə dair heç bir konkret məlumat verilə bilməz: "Bu əməliyyatın parametrləri və məqsədləri hələ də aydın deyil. Yalnız bu parametrlər və məqsədlərə əsasən, iştirakçı ölkələrin hərbi qüvvələrinin say və keyfiyyəti barədə danışmaq olar".
O bildirib ki, yalnız bir halda Qərb koalisiyasının qoşunları Ukraynada yerləşdirilə bilər: "Əgər onlar Rusiyanın silahlı təcavüzünə qarşı NATO ölkələrinin qüvvələrinin bir hissəsi olaraq yerləşdiriləcəksə".
Grabski, həmçinin sülhməramlı missiyanın Ukraynada yerləşdirilməsini tamamilə rədd edib və bu barədə şəxsi təcrübəsini diqqətə çatdırıb: "Sülhməramlı missiya yalnız tərəflərin razılığı ilə həyata keçirilə bilər. Lakin Rusiya Ukraynada heç bir sülhməramlı bölmənin yerləşdirilməsini qəbul etmir".
Ekspert əlavə edib ki, yalnız Ukrayna və Rusiya arasında beynəlxalq sərhədlərdə sülhməramlı missiya qəbul edilə bilər. "Bütün digər məsələlər detaldır və 25 fevral 2022-ci ildən bu yana heç bir irəliləyiş yoxdur".
Aydan Quliyeva
19:14 07.04.2025
Oxunuş sayı: 8165
