İsrail Türkiyəyə mesaj verdi: Yaxın Şərqdə müharibə genişlənir?
İsrail Suriyada "Şeyh Dağı"nı işğal etdikdən sonra bölgədə gərginliyi artırmağa davam edir. Belə ki, Türkiyə Silahlı Qüvvələrinin Suriyadakı Tiyas (T4) Hava Bazasına yerləşmək istədiyi barədə iddialar ortaya çıxıb.
Crossmedia.az xəbər verir ki, bu barədə Türkiyənin “Haber Global” telekanalının saytında məqalə dərc olunub.
Məlumata görə, bu iddialardan sonra İsrail Dəməşq və ətrafındakı strateji nöqtələri bombardman etməyə başlayıb. Bu hərəkətlərin Türkiyəyə qarşı bir mesaj olduğu iddia olunur və bölgədəki gərginliyin daha geniş bir münaqişəyə çevrilə biləcəyi bildirilib.
Daha əvvəl Qəzzada cinayətlər törətmiş İsrail bu dəfə Suriyanın Dera və Nava bölgələrinə hava hücumları edərək gərginliyi artırıb. Hücumlardan sonra İsrail mətbuatında yayılan xəbərlər Türkiyə-İsrail münasibətlərindəki gərginliyi gündəmə gətirib. "Jerusalem Post" qəzeti, İsrailli bir rəsminin Suriyadakı hücumların "Türkiyəyə mesaj vermək" məqsədilə həyata keçirildiyini bildirib.
Qeyd edək ki, xəbərdə İsrailin Türkiyənin Suriyada hərbi baza qurma ehtimalından narahat olduğu və bunu öz təhlükəsizliyi üçün təhdid olaraq gördüyü vurğulanıb.
Fatimə Məmmədova
19:30 05.04.2025
Oxunuş sayı: 9592
