Bolivyada mədən qarşıdurması zamanı baş verən partlayışda 5 nəfər öldü
Bolivyanın Yani şəhərində rəqib qızıl mədənçiləri arasında yaranan qarşıdurma zamanı baş verən partlayış nəticəsində azı 5 nəfər, o cümlədən hamilə qadın və bir yaşlı körpə həyatını itirib.
Crossmedia.az xarici mediaya istinadən bildirir ki, hadisə 3 aprel 2025-ci il tarixində səhər tezdən paytaxt La Pazın 144 kilometrliyində yerləşən Sorata dağ qəsəbəsinin yaxınlığındakı Yani mədən düşərgəsində baş verib. İlk olaraq ölənlərin sayı 6 nəfər kimi göstərilsə də, xilasedicilərin dağıntılar altından meyitləri çıxarmasından sonra bu rəqəm 5-ə endirilib.
Boliviya Daxili İşlər nazirinin müavini Conni Aquileranın sözlərinə görə, partlayışı törətdiyindən şübhələnilən şəxs də məsafədən idarə olunan bombanın partlaması nəticəsində ölüb.
Partlayış nəticəsində yaxınlıqdakı üçmərtəbəli evə ziyan dəyib, ətrafdakı digər tikililər də dağılaraq avtomobil və traktorlar yanıb, elektrik enerjisi kəsilib.
Qızıl mədənçilərindən birinin hüquq məsləhətçisi Coni Silva bildirib ki, bu qarşıdurma illərdir müəyyən qızıl damarlarına çıxışla bağlı mübahisə edən iki rəqib mədən qrupunun uzunmüddətli münaqişəsinin bir hissəsidir. Qarşıdurmada iştirak edən qızıl mədənçiləri Bolivyanın böyük kooperativ sektoruna aiddir.
Qeyd edək ki, bu sənətkar mədənçi qruplarının ölkədə fəaliyyət göstərməsinə qanuni icazə verilir və hökumət məlumatlarına əsasən, kooperativlər Bolivyanın ümumi mədən hasilatının 58 faizinə cavabdehdir. Kooperativlərin genişlənməsi isə iqtisadi böhranlar nəticəsində mədən şirkətlərinin işçi sayını azaltmasından sonra baş verib.
Fərqli mədən kooperativləri arasındakı qarşıdurmalar nadir hal deyil. Eyni zamanda, 2006–2019-cu illərdə hakimiyyətdə olan sabiq prezident Evo Morales dövründə mədən sektoruna nəzarət edən dövlət şirkəti Comibol-un əməkdaşları ilə də tez-tez toqquşmalar baş verib.
Xatırladaq ki, 2023-cü ildə Boliviya təxminən 2,87 milyard dollar dəyərində qızıl ixrac edib.
Fatimə Nəbiyeva
14:35 05.04.2025
Oxunuş sayı: 769
