ABŞ-da mart ayında iş yerlərinin sayı gözləntiləri üstələdi
ABŞ-da mart ayında əmək bazarı gözləntiləri üstələyib. Ölkə üzrə işəgötürənlər ay ərzində 228 min yeni iş yeri yaradıblar ki, bu da iqtisadçıların proqnozlaşdırdığı 130 mindən xeyli çoxdur. İşsizlik səviyyəsi isə 4,2 faizə yüksəlib.
Crossmedia.az xarici mediaya istinadən bildirir ki, fevralla müqayisədə məşğulluq artımı əhəmiyyətli dərəcədə yüksək olub. Yanvar və fevral aylarına dair məlumatlar isə yenidən nəzərdən keçirilərək 48 min azaldılıb. Orta saatlıq maaşlar martda 0,3 faiz artıb, illik artım isə 3,8 faiz təşkil edib. Bu rəqəm Federal Ehtiyat Sisteminin 2 faiz inflyasiya hədəfinə yaxın sayılan 3,5 faizlik göstəriciyə uyğundur.
Ən çox iş yerləri səhiyyə (54 min) və ictimai iaşə sektorlarında (30 min) yaranıb. Əvəzində federal hökumətdə 4 min iş yeri azalıb ki, bu da Tramp administrasiyasının dövlət işçilərinin ixtisarı siyasətinin nəticəsi kimi dəyərləndirilir.
Prezident Donald Trampın genişmiqyaslı idxal tarifləri və immiqrantların deportasiyasına dair siyasəti gələcəkdə əmək bazarına mənfi təsir edə bilər. Qeyri-qanuni mühacirlərin ölkədən çıxarılması işçi çatışmazlığını artıraraq inflyasiyanı yenidən yüksəldə bilər.
2021–2023-cü illərlə müqayisədə bazar daha zəif olsa da, iqtisadiyyat hələ də dayanıqlılığını qoruyur. İqtisadçılar ABŞ-ın yüksək faizlər fonunda tənəzzüllə üzləşəcəyini gözləsələr də, istehlak və məşğulluq göstəriciləri hələlik bu ssenarini təsdiqləmir.
Lakin son aylar inflyasiyanın yenidən artması və FED-in faiz endirimlərini təxirə salması narahatlıqları artırıb. Miçiqan Universitetinin sorğusuna əsasən, amerikalıların üçdə ikisi yaxın 1 il ərzində işsizliyin artacağını düşünür.
Mütəxəssislər, o cümlədən Jefferies və PNC Economics-dən olan iqtisadçılar mart göstəricilərinin mövsümi düzəlişlərlə şişirdilə biləcəyini, yaxın aylarda isə bu rəqəmlərin yenidən aşağı nəzərdən keçiriləcəyini bildirirlər.
Zəhra Ağayeva
14:10 05.04.2025
Oxunuş sayı: 827
