OPEC hasilatı artırdı, Trampın tarifləri neft qiymətlərini 6% ucuzlaşdırdı
OPEC və müttəfiqlərinin hasilatı artırması və ABŞ Prezidenti Donald Trampın tarif qərarları fonunda xam neftin qiymətləri son illərin ən aşağı səviyyəsinə düşüb.
Crossmedia.az xarici mediaya istinadən bildirir ki, Cümə axşamı Brent markalı neftin qiyməti 6,42% azalaraq 70,14 dollar/barel, West Texas Intermediate (WTI) isə 6,64% azalaraq 66,95 dollar/barelə enib. Qiymətlər Asiya sessiyasında daha da ucuzlaşaraq 2021-ci ilin dekabrından bəri ən aşağı səviyyəyə yaxınlaşıb.
Trampın “Azadlıq günü” bəyanatı ilə açıqladığı yeni tariflər investorlar arasında qlobal ticarət müharibəsi qorxusu yaradıb. Neft və mis kimi artıma həssas əmtəələr təzyiq altına düşüb. ABŞ administrasiyası xam neftin, qazın və emal olunmuş məhsulların tariflərdən azad olacağını bildirsə də, bazar bu açıqlamaya mənfi reaksiya verib.
OPEC hasilat planını açıqlayıb
OPEC-in Səudiyyə Ərəbistanı, Rusiya, İraq, Küveyt, Qazaxıstan, Əlcəzair və Oman daxil olmaqla səkkiz üzvü may ayında birgə hasilatı sutkada 411 min barel artıracaq. Bu artım bazarın gözlədiyi 140 min bareldən çoxdur. OPEC bu qərarla hasilatın azaldılması prosesini sürətləndirməyi planlaşdırır.
Təşkilatın açıqlamasında qeyd olunub ki, bu artımlar bazar şəraitindən asılı olaraq dayandırıla və ya geri qaytarıla bilər. İyunun hasilat səviyyəsi ilə bağlı qərar mayın 5-də keçiriləcək görüşdə veriləcək.
Geosiyasi gərginlik və təchizat riski
Tramp administrasiyasının İran, Rusiya və Venesuelaya qarşı tarif təhdidləri həmin ölkələrdən neft tədarükünü azalda bilər. Venesuela neftinə artıq 25 faizlik rüsum tətbiq olunub. Tramp Rusiya neftinə qarşı 50 faizə qədər tarif tətbiq ediləcəyi ilə bağlı xəbərdarlıq edib, İrana isə “bombalama” və “ikinci dərəcəli tariflər”lə hədə gəlib.
İranın gündəlik neft hasilatı 1,5 milyon barelə, Venesuelanın isə 900 min barelə çatıb. Hər iki ölkənin ixracında azalma qlobal təchizat tarazlığını poza bilər.
Zəhra Ağayeva
14:00 05.04.2025
Oxunuş sayı: 9777
