Rusiya Ukraynanın Kryvyi Roh şəhərinə raket zərbəsi endirib: 14 ölü
Rusiya ordusunun Ukraynanın mərkəzində yerləşən Kryvyi Roh şəhərinə endirdiyi ballistik raket zərbəsi nəticəsində azı 14 nəfər həlak olub. Ölənlər arasında altı uşaq da var.
Crossmedia.az xarici mediaya istinadən bildirir ki,Dnepropetrovsk Vilayət Hərbi Administrasiyasının rəhbəri Serhii Lısak Telegram kanalında bildirib ki, raket hücumu nəticəsində 30-dan çox insan yaralanıb və onlar xəstəxanalarda müalicə olunur. Yaralılar arasında bədəni parçalanmış üç aylıq körpə də var.
Şəhərin sakinləri hücumun dəhşətli olduğunu deyir. Hücum zamanı yaralanan Nina adlı qadın bildirib: “Heç yerə qaça bilmədim, görürsən, qapıya belə çata bilmədim. Bütün pəncərələr qırıldı.”
Ukrayna Prezidenti Volodimr Zelenski raket hücumlarını pisləyərək, ölənlərin və yaralananların ailələrinə başsağlığı verib. “Xilasetmə əməliyyatları davam edir. Azı beş binaya ciddi ziyan dəyib. Rusiya atəşkəs istəmir, bu aydındır. Gündəlik hücumlar, gündəlik itkilər. Bunu bütün dünya görür,” – deyə Zelenski bildirib.
Prezident əlavə edib ki, “hər bir raket, hər bir hücum sübut edir ki, Rusiya ancaq müharibə istəyir. Yalnız qlobal təzyiq və Ukraynanın hava hücumundan müdafiə sistemlərinin gücləndirilməsi ilə bu müharibəyə son qoymaq olar.”
Zəhra Ağayeva
13:40 05.04.2025
Oxunuş sayı: 11619
