Polşa Avropada məcburi hərbi xidmətə dönüş edən növbəti ölkə oldu
Avropada təhlükəsizliklə bağlı narahatlıqlar artdıqca bir sıra ölkələr məcburi hərbi xidmətin yenidən tətbiqi məsələsini gündəmə gətirir. Bu sıraya Polşa da qoşulub. Ölkənin Baş naziri Donald Tusk hökumətin kişilər üçün məcburi hərbi təlimi bərpa etməyi planlaşdırdığını açıqlayıb. Onun sözlərinə görə, bu addım ölkənin müdafiə qabiliyyətini gücləndirmək məqsədi daşıyır.
Donald Tusk bildirib ki, hazırda Polşanın cəmi 200 min hərbçisi var və bu sayın 500 minə çatdırılması hədəflənir. O, regionda baş verən gərginliklər fonunda ölkənin hərbi qüvvələrinin gücləndirilməsinin zəruri olduğunu vurğulayıb.
"Rusiyanın 1,3 milyon, Ukraynanın 800 min hərbçisinin olduğunu nəzərə alsaq, bizim də daha güclü hərbi qüvvəyə ehtiyacımız var. Bir müharibə baş verərsə, Polşadakı bütün kişilərin hərbi hazırlıq keçmiş olmasını istəyirik" – deyə o bildirib.
Bu arada, məcburi hərbi xidmətin qüvvədə olduğu Rusiyada da səfərbərlik tədbirləri güclənir. 2024-cü ilin yaz çağırışı çərçivəsində 160 min nəfər hərbi xidmətə çağırılıb. Bu, 2011-ci ildən bu yana ən böyük çağırış kampaniyası hesab edilir.
Polşanın məcburi hərbi xidmətə yenidən qayıtması Avropada yeni hərbi strategiyanın formalaşdığını göstərir. Xüsusilə, Şərqi Avropada yerləşən ölkələr regional təhlükəsizlik risklərini nəzərə alaraq, öz ordularını gücləndirmək istiqamətində addımlar atır.
Mütəxəssislərin fikrincə, Avropada məcburi hərbi xidmətə qayıdış tendensiyası gələcəkdə daha geniş yayıla bilər. Polşanın bu qərarının regionun təhlükəsizlik siyasətində yeni mərhələnin başlanğıcı olması gözlənilir.
Nigar Yahyazadə
07:16 05.04.2025
Oxunuş sayı: 10234
