Rusiya prezidentinin xüsusi nümayəndəsinin ABŞ səfəri uğurlu olub
Rusiya Birbaşa İnvestisiya Fondunun rəhbəri və Rusiya Prezidentinin xüsusi nümayəndəsi Kirill Dmitriyevin ABŞ-a səfəri uğurlu alınıb. Rusiya KİV-in diplomatik mənbələrə istinadla yaydığı məlumata görə, səfərin daha konkret nəticələrinin Pasxa bayramına yaxın dövrdə üzə çıxacağı ehtimal edilir.
Mənbələrin bildirdiyinə görə, danışıqlar çərçivəsində müvəqqəti atəşkəsin əldə olunması və döyüş xəttində hərbi əməliyyatların dayandırılmasını nəzərdə tutan çərçivə sazişinin hazırlanmasına başlanıla bilər.
Bununla yanaşı, Rusiya tərəfi ikitərəfli danışıqlar prosesinə başlamaq üçün Ukraynada legitim fiqurun müəyyənləşdirilməsi məqsədilə xüsusi alqoritm hazırlayacaq. Ehtimal olunur ki, Kreml bu məqsədlə Ukrayna Prezidenti Volodimir Zelenskiyə qarşı ritorikasını dəyişə bilər.
Amerika tərəfi isə Rusiyanı əmin edib ki, Ukraynada Ali Rada və prezident seçkilərinin keçirilməsi ilə bağlı Moskvanın irəli sürdüyü tələblərin yerinə yetirilməsinə zəmanət veriləcək.
22:30 04.04.2025
Oxunuş sayı: 7254
