3+3 formatı Azərbaycanla Ermənistan arasında sülh danııqlarına necə töhfə verə bilər? -AÇIQLAMA
Azərbaycan və Ermənistan arasında sülh danışıqları regionun gələcəyi üçün strateji əhəmiyyət kəsb edir. Bu prosesdə müxtəlif beynəlxalq və regional aktorlar fərqli yanaşmalar təklif edir. Son dövrlərdə gündəmə gətirilən “3+3” formatı da regiondakı siyasi dinamikanın bir hissəsi kimi təqdim olunur.
İranın Ermənistandakı səfiri Mehdi Sobhani də bu mövzuya toxunaraq, “3+3” formatının sülh prosesinə töhfə verə biləcəyini bildirib. Onun sözlərinə görə, İran həm Ermənistan, həm də Azərbaycanla təmaslarını davam etdirir və bölgədə sabitliyin tərəfdarıdır. Lakin bu formatın sülhə real təsir imkanlarını və münaqişənin həllində nə dərəcədə effektiv olacağını təhlil etmək vacibdir.
Azərbaycan və Ermənistan arasındakı sülh prosesində “3+3” formatının rolu barəsində Crossmedia.az-a politoloq Elçin Xalidbəyli açıqlama verib: "Bu platforma dövlətlər üçün siyasi və iqtisadi əməkdaşlıq baxımından əhəmiyyətli ola bilər. Lakin 3+3 formatından bundan artığını gözləmək həm sadəlövhlük olar, həm də geosiyasi proseslərə ziddir. Çünki Azərbaycan və Ermənistan arasındakı sülh prosesi yalnız İrəvan və Bakı arasında həll olunmalı bir məsələdir. Bunun kənar dövlətlərə aidiyyəti yoxdur".
Politoloq qeyd edib ki, iki dövlət arasında müharibə konkret nəticələrlə yekunlaşıb: "Sülh danışıqları da bu nəticələrə uyğun davam edir. Tərəflər birbaşa təmaslar nəticəsində artıq bir çox problemi həll edib. Onlar beləliklə, mövcud problemləri bundan sonra da həll etmək üçün imkan və potensiala malik olduqlarını sübut edirlər".
E.Xalidbəyli, həmçinin vurğulayıb ki, başqa dövlətlərin danışıqlara müdaxilə edəcəyi təqdirdə müzakirələrin məzmunu dəyişir: "Çünki həmin dövlətlər sülh prosesindən daha çox öz maraqlarını ön plana çəkir, öz şərtlərini formalaşdıraraq qarşı tərəflərə diktə etməyə çalışırlar. Bu baxımdan, istər İran, istər Rusiya, istərsə də Avropa İttifaqı (Aİ) və ya ABŞ daxil olmaqla hər hansı bir dövlətin Azərbaycan və Ermənistan arasındakı sülh prosesinə müdaxilə etməsi yolverilməzdir. Bakı və İrəvan arasındakı sülh danışıqları yalnız bu iki dövlətə aid məsələdir və bu, məhz onların arasında həll olunmalıdır".
Xumar Emilqızı
16:50 03.04.2025
Oxunuş sayı: 10490
