Azərbaycan və Almaniya arasında davamlı siyasi dialoq mövcuddur - Deputat Açıqladı
Bildiyimiz kimi, Almaniya Prezidenti Frank-Valter Ştaynmayer və həyat yoldaşı aprelin 2-də Azərbaycana ilk rəsmi səfər ediblər. Almaniya Prezidentinin Azərbaycana səfəri, iki ölkə arasında diplomatik əlaqələrin inkişafı və regional məsələlərin müzakirəsi baxımından əhəmiyyətli bir addımdır. Prezident Ştaynmayerin Azərbaycana rəsmi səfəri, həmçinin iki ölkə arasında mövcud olan əməkdaşlığın möhkəmləndirilməsinə və yeni sahələrdə əməkdaşlığın genişləndirilməsinə şərait yaratmaq məqsədi güdür.
Bu səfər həmçinin iki tərəf arasında iqtisadi, siyasi və mədəni əlaqələri dərinləşdirmək üçün mühüm bir platforma təklif edir. Prezident İlham Əliyev ilə keçirilən görüşdə müxtəlif məsələlərin, o cümlədən enerji sahəsində əməkdaşlığın, Azərbaycanın rolunun Avropada daha da güclənməsinin müzakirə olunması regionda stabilliyin qorunması baxımından vacibdir. Ən mühüm məqamlardan biri tərəflərin gələcəkdə daha sıx əməkdaşlıq etməyə qərar verməsidir.
Mövzu ilə bağlı Crossmedia.az-a açıqlama verən Milli Məclisin depuatatı Pərvanə Vəliyeva ilk olaraq bildirib ki, bu səfər Azərbaycan və Almaniya arasındakı münasibətlərə yeni müsbət təkan verəcək:
“Həm təkbətək görüşlərdə, həm də nümayəndə heyətləri ilə aparılan danışıqlarda iki ölkə arasındakı əlaqələrin gələcək inkişafı müzakirə olunub. Xüsusilə iqtisadi sahədə ticarət dövriyyəsinin üç dəfə artması və bərpa olunan enerji sahəsində əməkdaşlıq imkanları diqqət mərkəzində olub. Azərbaycanın ev sahibliyi etdiyi COP29 beynəlxalq iqlim konfransı uğurlu nəticələr verib. 197 ölkədən 77 mindən çox iştirakçının qatıldığı tədbirdə Almaniya ilə sıx əməkdaşlıq qurulub. Konfransdan öncə “kiçik COP” adlanan Almaniyanın Bonn şəhərində Konvensiyaya tərəf ölkələrin yardımçı qurumlarının (subsidiary body 60) 60-cı sessiyası keçirilmiş, Azərbaycan nümayəndə heyəti konfransda geniş tərkibdə iştirak edib”.
Cənab prezident, həmçinin qeyd etdi ki, Ermənistanın konfransa qatılmaması təəssüf doğurur, xüsusilə Azərbaycan-Ermənistan münasibətlərinin normallaşdığı bir dövrdə bu addım başa düşülən deyil:
“Ermənistan konfransı siyasi səbəblərlə boykot edən və iştirak etməyən yeganə tərəf ölkə olub. Bununla o, həm də ətraf mühit və iqlim dəyişmələri məsələlərinə biganə və məsuliyyətsiz yanaşdığını göstərib. Görüşdə Prezident İlham Əliyev Azərbaycanın 30 il ərzində erməni işğalından zərər çəkməsini qeyd edərək, işğal nəticəsində 1 milyona yaxın insanın məcburi köçkün vəziyyətinə düşdüyünü bildirib. Azərbaycan Ermənistanın təcavüzündən və işğalından əziyyət çəkib. Bu dövrdə ölkəmiz həm humanitar, həm iqtisadi, həm də ekoloji baxımdan ciddi zərərlərə məruz qalıb. BMT Təhlükəsizlik Şurası 1993-cü ildə 4 qətnamə (822, 853, 874, 884) qəbul edərək Ermənistan qoşunlarının Azərbaycan torpaqlarından dərhal çıxmasını tələb edib. Buna baxmayaraq, Ermənistan qətnamələri icra etməyib, işğal rejimini davam etdirib. ATƏT-in Minsk Qrupu vasitəsilə danışıqlar aparılsa da, Ermənistan illərlə sülh prosesini pozaraq status-kvonu qorumağa çalışıb. Beynəlxalq təşkilatlar bu məsələyə ciddi müdaxilə etməsə də, Azərbaycan münaqişəni siyasi və hərbi yollarla həll edib.
Bu tarixi qələbə sülh prosesinə yol açıb və hazırda iki ölkə arasında sülh sazişi istiqamətində müsbət irəliləyişlər var. Dövlət başçısı görüşdə Ermənistanla sülhün şərtlərini də açıqlayıb. Ermənistan Konstitusiyasına dəyişiklik edilməsi vacibdir, çünki bu sənəddə Azərbaycana qarşı ərazi iddiaları mövcuddur. Eyni dərəcədə labüddür ki, Ermənistan ATƏT-in fəaliyyətsiz Minsk qrupunun ləğvi istiqamətində əməli addımlar atsın. Ermənistanın bu öhdəlikləri bir-bir yerinə yetirməsi bizi sülhə yaxınlaşdıracaq. Qeyd edim ki, Almaniya 12 yanvar 1992-ci ildə Azərbaycanın müstəqilliyini tanıyıb. İki ölkə arasında diplomatik münasibətlər 20 fevral 1992-ci ildə qurulub.Səfirliklər 1992-ci ilin sentyabrında açılıb. Azərbaycan və Almaniya arasında davamlı siyasi dialoq mövcuddur”,- deyə deputat fikrini yekunlaşdırıb.
Nəzrin Salmanova
16:20 03.04.2025
Oxunuş sayı: 1022
